भारतीय कोरोना खोप नेपाल थ्यंन
डंगोल | पोहेलाथ्व अष्टमी ११४१, माघ ८ विहीबाः
भारतं नेपालयात अनुदानय् बिउगु कोरोनाविरुद्धया खोप नेपालय् थ्यंगु दु ।
भारतं नेपाःयात १०गू लखः डोज कोरोना खोपया न्हापांगु खेप ज्वना एयर इण्डियाया जहाज नेपाःया त्रिभुवन अन्तर्राष्ट्रिय विमानस्थल अवतरण जूगु खः ।
अक्सफोर्ड व एस्ट्राजेनेकां विकास याःगु सेरम इन्स्टिच्युट अफ इन्डियां उत्पादन याःगु कोभिसिल्ड खोप भारतं नेपाःयात बिउगु खः ।
विमानस्थलय् नेपाःया लागि भारतीय राजदूत विनयमोहन क्वात्रां स्वास्थ्य मन्त्रालययात खोप हस्तान्तरण यानादिल । उगु खोपयात टेकुइ च्वंगु स्वास्थ्य सेवा विभागय् भण्डारण याइगु जुई ।
स्वास्थ्य सेवा विभागं दक्वः प्रदेशया भण्डारण केन्द्रमा खोप थ्यंकेगु जुई ।
क्वछिनातःगु केन्द्रपाखें न्हापांगु झ्वलय् स्वास्थ्यकर्मी, सफाइकर्मी, सुरक्षाकर्मी, एम्बुलेन्स चालक, शव व्यवस्थापन टोलीपिन्त खोप बिइगु मन्त्रालयं न्ह्यथंगु दु ।
स्वास्थ्य मन्त्रालयया अनुसार छवाः दुने हे कोरोनाविरुद्धया खोप बिइगु ज्याझ्वः न्ह्याकेगु धयादिल ।
