चीनं नेपाःयात मुक्कं च्यागू लख डोज कोभिड १९ या खोप बिइगु
लहनान्यूज | सिल्लागा तृतीया ११४१, फागुन १७ मंगलबाः
चीनं नेपाःयात कोभिड १९ विरुद्ध मेगु स्वंगु लख खोप अनुदानय् बिइगु जूगु दु ।
नेपाःया नितिं चिनियाँ राजदूत होउ यान्छीं सामाजिक सञ्जाल ट्वीटरपाखें उगु ल्याःया खोप बिइगु धाःगु खः ।
न्हापांखुसी न्यागू लखः डोज बिइगु धाःगु चिनं मेगु स्वंगु लखलिसें च्यागू लख डोज खोप बिइगु क्वःज्यूगु खः ।
चिनियाँ सरकारी खोप निर्माता सिनोफार्मं दयेकूगु खोप नेपाःया बिइत्यंगु खः । थ्व खोपयात आपतकालिन छ्यलेज्याया नितिं सरकारं नं अनुमति बिइधुंकूगु दु ।
खोप ८० प्रतिशत तक्क प्रभावकारी जूगु धाःगु दु । थ्वःसियां न्ह्यः भारतं १०गू लख डोज खोप अनुदान ब्यूगु खः ।
