च्याम्पियन्स लिग फुटबलय युभेन्टस व सेभिया पिहाँवन
सिल्लागा द्धादशी ११४१, फागुन २६ बुधवाः
![](https://www.lahananews.com/sites/default/files/1_63.jpg)
जर्मनीया बोरुसिया डर्टमण्ड व पोर्चुगलया एफ.सी पोर्टो युरोपियन च्याम्पियन्स लिग फुटबल धेंधेंबल्लाया क्वाटरफाइनलय् थ्यंगु दु ।
वंगु चान्हय् जूगु राउण्ड अफ सिक्सटिनया निगूगु लेगय् डर्टमण्डं स्पेनया सेभियानाप २–२गु गोलया ज्वलिंज्वः कासा म्हितूगु दु । न्हापांगु लेगया कासा ३–२ गोलं त्याकूगु डर्टमण्डं समग्रय् कासा थःगु पक्षय् लाकूगु दु ।
वंगु चान्हय्या कासाय् डर्टमण्डया नितिं निगुलिं गोल नर्वेया कासामि अर्लिङ ब्रौट हालाण्डं याःगु दु । सेभियाया योसुफ उन नेसेरीं निगोल याःसां पुचःयात क्वाटरफाईनलय् थ्यंके मफुत ।
![](https://www.lahananews.com/sites/default/files/pictures/2_9.jpg)
अथेहे वंगु चान्हय् जूगु मेगु कासाय् १०म्ह कासामिइ लिकुंगु एफसी पोर्टों इटालीया युभेन्टसयात निराश यानाब्यूगु दु । निगूगु लेगय् युभेन्टसनाप ३–२ गोलं बूसां न्हापांगु लेगय् २–१ गोलं त्याकूगु पोर्टों समग्रय् ४–४गु गोलया ज्वलिंज्वः याःगु दु ।
![](https://www.lahananews.com/sites/default/files/pictures/3_5.jpg)
अनलिं युभेन्टसया मैदानय् याःगु निगोल अवे गोलया ग्वहालिं पोर्टो क्वाटरफाईनलय् थ्यंगु दु । युएफा च्याम्पियन्स लिगअन्तर्गत राउण्ड अफ सिक्सटिनया निगु कासा थौं चान्हय् जुइ ।
थौं इंग्ल्याण्डया लिभरपुल व जर्मनीया आर.बी लेप्जीग अले फ्रान्सया पेरिस सेन्ट जर्मेन व स्पेनया बार्सिलोनादथुइ कासा जुइ ।
Categorized in कासा