शहीद स्मारक ‘सी’ डिभिजन लिग फुटबल थौंनिसें न्ह्याइगु, उद्घाटन कासाय् खालीबारी युथ क्लब व झापा म्हितिइगु
चिल्लाथ्व पारु, ११४१ चैत १, आइतबाः
अखिल नेपाल फुटबल संघ (एन्फा)या ग्वःसालय् शहीद स्मारक ‘सी’ डिभिजन लिग फुटबल थौंनिसें न्ह्यायेत्यंगु दु ।
२०७६ सालय् जुइमाःगु ‘सी’ डिभिजन लिग कोभिड–१९ या महामारीया हुनिं स्थगित जूगु खः । १४गू टिमं धेँधेँबल्ला याइगु ‘सी’ डिभिजन लिगय् ५२गू कासा म्हितिइ धाःसा स्वंगु टीम ‘बी’ डिभिजनय् बढुवा जुइगु आयोजकं न्ह्यथंगु दु ।
अथेहे छगू टिम रेलिगेसनय् लाई । दुथ्यागु १४गू क्लबयात निगू पुचलय् तःगु खः । पुचः ‘ए’लय् वीरगन्ज युथ एकेडेमी, खालीबारी युथ एफसी, मनोहरा युनाइटेड क्लब, सानो गौचरण युथ क्लब, समाज कल्याण खेलकुद केन्द्र, महावीर क्लब व झापा एफसी लाःगु दु ।
अथेहे पुचः ‘बी’लय् प्लानिङ ब्वाइज युनाइटेड, ओसिस क्लब, सानेपा क्लब, सामाजिक युवा क्लब, स्वयम्भु क्लब, वीरगन्ज युनाइटेड क्लब प चर्च ब्वाइज युनाइटेड क्लब लाःगु दु । निगूलिं पुचःया राउण्ड रोविन लिगया लिधंसाय् जुई ।
निगू पुचः याना ४२गू कासा जुई । न्हापांगु झ्वलय् सुपर लिग जुई गुकिइ गुंगु कासा जुई । अथेहे रेलिगेसनया नितिं कासा जुई । पुचः ‘ए’खय् लानाच्वंगु खालीबारी युथ क्लब व झापा दथुई थौं उद्घाटन कासा जुईत्यंगु दु ।
अथेहे पुचः ‘बी’खय् लाःगु ओसिस चर्च ब्वाइजदथुई मेगु कासा जुई । न्हापांग झ्वःया लिपांगु कासा चैत २४ गते समाज कल्याण खेलकुद केन्द्र व महावीर क्लब लिसें स्वयम्भु व वीरगन्ज दथुई धेँधेँबल्ला जुई ।
अथेहे निगू पुचःया लिपांगु थासय् लाःगु पुचःया दथुई रेलिगेसनया नितिं प्लेअफ कासा जुई । उगु कासाय् बूगु टोली ‘सी’ डिभिजन क्वालिफायरय् घटुवा जुई । सुपर लिगया ९गू कासालिपा न्हापांगु स्वंगु टो ‘बी’ डिभिजन लिगय् बढुवा जुई ।
