विमस्टेकया मुँज्या च्वनिगु
चिल्लागा चर्तुर्थी, ११४१, चैत्र १९ गते विहीबाः
बंगालया खाडीया पहल बहुक्षेत्रीय प्राविधिक व आर्थिक ग्वहालि, बिमस्टेकया मन्त्रिस्तरीय मुँज्या थौं च्वनेत्यंगु दु । न्हिनय् ३ताः ईलय् भर्चुअल प्रविधिपाखें च्वनीगु मुँज्यायात श्रीलंकां ग्वसाःग्वःगु दु ।
नेपाःयापाखें परराष्ट्रमन्त्री प्रदीपकुमार ज्ञवालीं ब्वति काइगु जूगु दु । वय्कनाप थीथी मन्त्रालयया मन्त्री व उच्चस्तरिय अधिकारीपिन्सं ब्वति काइगु परराष्ट्र मन्त्रालयं धागु दु ।
भर्चुअल रूपय् च्वनीगु मुँज्याय् नेपाली प्रतिनिधिमण्डलया नेतृत्व परराष्ट्र सचिव भरतराज पौड्यालं यानादीगु धागु दु । मुँज्याया एजेन्डा व मंका वक्तव्यय् सम्बोधन जुइगु विषय तकं क्वःछ्यूगु दु ।
सन् २०१८ य् जूगु बिमस्टेक शिखर सम्मेलनं बंगाल क्षेत्रया देशय् शान्ति व मंका सहकार्यय् बः ब्यूगु खः । थ्व क्षेत्रय् शिक्षाय् सकलें जनताया पहुँच थ्यंकेगु, भौगोलिक आबद्धतायात बःलाकेगु, प्राकृतिक व मानवीय स्रोत साधनया कालबिललिसे बहुसांस्कृतिक व ऐतिहासिक सम्बन्धयात तिबः बियाः विकास व समृद्धिइ हिलाःयंकेगु विषयलय् मंका अवधारणा न्ह्यब्वःगु खः ।
थौंया मुँज्याय् दीगो विकासया एजेन्डा सन् २०३० या लक्ष्य प्राप्तिया नितिं मंका सहकार्यय् बः बियाः थुपिं क्षेत्रया गरिबी व मेमेगु समस्या ज्यंकेत लँपु मालीगु धागु दु । नेपाः सन् २००४ निसें बिमस्टेकय् दुथ्यानावःगु दु । बिमस्टेकया १४गु प्राथमिकताया कार्यक्षेत्र दु ।
उकिइ व्यापार व लगानी, प्रविधि, ऊर्जा, यातायात व सञ्चार, पर्यटन, न्याँ लहीगु, कृषि, सांस्कृतिक सहकार्य, लकस व विपत् व्यवस्थापन, सार्वजनिक स्वास्थ्य, जन सम्पर्क सञ्जाल, गरिबी निवारण, आतंकवाद व संगठित अपराधविरुद्धया ज्या अले जलवायु परिवर्तन दु ।
