भीम तुलाधरया ‘दोष’ कन्हय् सार्वजनिक जुइगु
बिकाश | ने.सं. ११४१ बछलागा षष्ठी (२०७८ जेठ १७) साेमबार
![](https://www.lahananews.com/sites/default/files/dosh-2.jpg)
नांजाःम्ह पप म्येहालामि भीम तुलाधरया न्हूगु म्यूजिक भिडियो ‘दोष’ कन्हय् सार्वजनिक जुइगु जूगु दु । कन्हय् जुममार्फत भर्च्युअल ज्याझ्वः यासें म्ये सार्वजनिक यायेत्यंगु खः ।
नेपाःया संगीत ख्यलय् पप किंग तकं धाइम्ह वरिष्ठ म्येहालामि ओम विक्रम विष्टं म्यूजिक भिडियोया उलेज्या यानादीगु ज्याझ्वः क्वःज्यूगु दु ।
तुलाधरया थुगु म्ये न्हापांगु खुसी २०४८ सालय् जिजिविषा एल्बमय् पिदंगु खः । न्हापा भुपालमान सिंहं अरेंज यानातःगु थुगु म्येयात भुपेन्द्र बज्राचार्यया अरेंजय् तुलाधरं हाकनं हालादीगु खः ।
‘जिजिविषा एल्बम पिहांवःबलय् थ्व म्ये तसकं लोकं ह्वाःगु खः, थ्व म्ये जितः नं यःगु म्ये खः । अथेजुयाः आःया ट्रेन्ड कथं म्यूजिक अरेंज याकाः हाकनं रेकर्ड यानागु खः’ तुलाधरं धयादिल ।
आःतक्क दर्जन स्वयां आपाः सोलो एल्बम पिथनेगु लिसें स्वसः स्वयां अप्वः म्ये हालेधुंकूम्ह तुलाधरया सपनीमा व जिजिविषा तसकं लोकं ह्वाःगु म्येचाः खः ।
कन्हय् सार्वजनिक जुइत्यंगु दोष म्येया रचनाकार कविन्द्रमान शाक्य व ओमहरि श्रेष्ठ खःसा तुलाधर थम्हं हे लसय् हनादीगु खः ।
म्यूजिक भिडियोया परिकल्पनाकार व निर्देशक रवि सायमि खः । भवानी शिलाकारया छायाङ्कन निर्देशनय् दयेकूगु भिडियोया एडिटिङ वाइल्ड बुल्स प्रोडक्सनं याःगु दु । म्ये मोडलत निरोज शाक्य व आराध्यलक्ष्मी खड्गीं अभिनय याःगु दु ।
Categorized in मनोरन्जन