बार्सिलोना च्याम्पियन्स लिगया प्रि–क्वाटरफाइनलं पिदन, पीएसजी लिगया क्वाटरफाइनलय्
सिल्लागा त्रयोदशी ११४१, फागुन २७ विहीबाः
![](https://www.lahananews.com/sites/default/files/40315836-9345795-image-a-67_1615414892325.jpg)
बार्सिलोनायात बुका फ्रान्सेली क्लब पेरिस सेन्ट जर्मेन पीएसजी च्याम्पियन्स लिगया क्वाटरफाइनलय् थ्यंगु दु ।
प्रि–क्वाटरफाइनलया निगूगु लेगया कासा १गू–१गू गोलया ज्वलिन्ज्वःलय् क्वचाय्धुंका मुक्कंलय् ५–२गूया गोल अन्तरं कासा त्याका पीएसजीं लिपांगु ८गूया थाय् क्वजिइत ताःलाःगु खः ।
पीएसजीं न्हापांगु लेगय् बार्सिलोनायात उमिगु हे मैदानय् ४–१गूया गोल अन्तरं बुकुगु खः । घरेलु मैदान पार्क दि प्रिन्सेसय् वंगु चान्हय् जूगु कासाय् पीएसजीया केलियन एमबाप्पें गोल याःबलय् बार्सिलोनाया कप्तान लियोनेल मेस्सीं गोल याःगु खः ।
कासाया ३१गूगु मिनेटय् एमबाप्पेया पेनाल्टी गोलं पीएसजीं कासाय् अग्रता काःगु खः । पीएसजीया उगु अग्रता ताः ई न्ह्याये मफुत । ३७गूगु मिनेटय् कप्तान मेस्सीं गोल याना कासायात १गू–१गू गोलया ज्वलिन्ज्वःलय् दिकुगु खः ।