बैंगलोरं दिल्लीयात छगू रनं बुकल
चौलागा पारु ११४१,बैसाख १५ बुधवाः
![](https://www.lahananews.com/sites/default/files/Untitled-1_11.jpg)
इण्डियन प्रिमियर लिग, आईपिएल टी–ट्वेन्टी क्रिकेटय् रोयल च्यालेन्जर्स बैंगलोरं दिल्ली क्यापिटल्सयात छगू रनं बुकूगु दु ।
वंगु चान्हय् अहमदाबादय् जूगु कासाय् टस बुनाः न्हापां ब्याटिङ याःगु बैंगलोरं २०गू ओभरय् ५गू विकेटया क्षतिइ सछि व ७१गू रन दयेकूगु दु ।
बैंग्लोरया नितिं दक्षिण अफ्रिकी ब्याट्सम्यान एबी डे भिलियर्सं अविजित जुयाः ७५गू रन दयेकूगु दु । लिसलय् सछि व ७२गू रनया लक्ष्य ल्यूगु दिल्लीं २०गू ओभरय् ४गू विकेटया क्षतिइ सछि व ७०गू रन जक दयेकूगु खः ।
दिल्लीया कप्तान ऋषव पन्तं अविजित ५८गू रन अले शिम्रन हिटमेयरं अविजित ५३गू रन दयेकूसां पुचःयात त्याकेबीमफुत । बलिङपाखे बैंगलोरया हर्सल पटेलं २गू विकेट काःगु दु ।
कासा त्याःगुनाप शीर्ष थासय् थ्यंगु बैंगलोरं लिगय् न्याक्वः तक कासा त्याकूगु दु । बैंगलोरं ६गू कासापाखें १०गू ल्या मुंकूगु दु । ज्वःलाक्क म्हितूगु कासाय् ८गू ल्या दयेकूगु दिल्ली स्वंगूगु थासय् दु ।
निगूगु थासय् दुगु चेन्नाई सुपर किङ्ग्सया न ज्वःलाक्क ८गू ल्या दु । चेन्नाईलं थौं बहनी दिल्लीइ जुइगु कासाय् सनराईजर्स हैदरावादनाप धेंधेंबल्ला याइ ।
Categorized in कासा