आर्मीं ७-० या तब्यागु अन्तरं विराटनगरयात बुकल ।
पोहेलागा चतुर्थी ११४१, माघ १९ सोमवाः
![](https://www.lahananews.com/sites/default/files/army.jpg)
महिला राष्ट्रिय लिग अन्तर्गत थौं क्वचाःगु न्हापांगु कासाय् त्रिभुवन आर्मी फुटबल क्लबं विराटनगर महानगरपालिकायात बुकूगु दु । सातदोबाटोया एन्फा कम्प्लेक्स जूगु कासाय् आर्मीं ७-० या तब्यागु अन्तर कासा त्याकूगु खः ।
आर्मीयात त्याकेत शर्मिला थापां ह्याट्रिक याःगु खः । अथेहे विमला चौधरीं निगू गोल, रश्मी घिसिङं व बिमला विक न १-१ गोल यात ।
कासाया ३६गू मिनेटय् बिमलां आर्मीयात न्हापांगु गोल याःगु खः । अथेहे ४५गू मिनेटय् शर्मिलां मेगु गोल यात । अथेहे इन्ज्युरी ईलय् शर्मिलां हाकनं गोल याना न्हापांगु हाफय् आर्मी ३ गोलं न्ह्यने लाःगु खः ।
मेगू हाफय् शर्मिलां ह्याट्रिक पूरा यात । कासाया ६१गू मिनेटय् शर्मिलां मेगू छगोल तना ह्याट्रिय याःगु खः । अथेहे ६७गु मिनेटय् रश्मी घिसिङं पेनाल्टीपाखें छगोल तन । ७१गू मिनेटय् बिमला विक व ८४गू मिनेटय् विमला चौधरीं गोल याना आर्मीं त्याकूगु खः । थ्व जितधुंका आर्मी ५ गू कासां १० ल्याखं तालिकाया निगूगु थासय् लाःगु दु ।
Categorized in कासा