सर्वाेच्चं तल अख्तियार दुरुपयोग अनुसन्धान आयोगया स्टिङ अप्रेशनयात रोक
लहनान्यूज | चौलाथ्व नवमी ११४१,बैसाख ८ बुधवाः
अख्तियार दुरुपयोग अनुसन्धान आयोगं यानावयाच्वंगु स्टिङ अप्रेशनयात सर्वोच्च अदालतं अवैध ठहर याःगु दु ।
थौैं प्रधानन्यायाधीश चोलेन्द्रशम्शेर जबरा, न्यायाधीशपिं दीपककुमार कार्की, मीरा खड्का, हरिकृष्ण कार्की व ईश्वरप्रसाद खतिवडालिसें संवैधानिक इजलासं स्टिङ अपरेशन दिकेत रिट जारी याःगु खः ।
अख्तियारं अख्तियार दुरुपयोग अनुसन्धान आयोग नियमावली, २०५९ या नियम ३० य् दूगु व्यवस्थाया लिधंसाय् स्टिङ अपरेशन यानावयाच्वंगु खः । २०७४ पुष २ गते अधिवक्ता बिष्णु घिमिरें अख्तियारया स्टिङ अपरेशन दिकेत सार्वजनिक सरोकारया रिट दायर याःगु खः ।
उगु रिटय् सुनुवाइ यासें सर्वोच्चं नियमावलीया उगु व्यवस्था नेपालया संविधानया धारा १३३ या उपधारा (१) कथं थौं निसें लागू जुइकथं बदर यानादिगु खः ।
आः अख्तियार दुरुपयोग अनुसन्धान आयोगं स्टिङ अपरेशनया लिधंसाय जक दायर यानातःगु प्यसः सिबें अप्वः मुद्दा खारेज जुइगु जूगु दु ।
सर्वोच्च अदालतया संवैधानिक इजलासं थौं स्टिङ अपरेशन याना मुंकूगु प्रमाण ग्रहण योग्य मजुगु व सुनुवाई मजूनिगु वा न्यायिक प्रक्रियाय् लानाच्वंगु दक्वः मुद्दा खारेज जुइगु आदेश बिउगु खः ।
