किसान क्रेडिट कार्ड व एप शुभारम्भ
डंगोल | पोहेलाथ्व सप्तमी ११४१, माघ ७ बुधवाः
नेपाल कृषि विकास बैंकं थौंनिसें किसान क्रेडिट कार्ड व किसान एप न्ह्याकूगु दु ।
कृषि विकास बैंकया ५४ क्वःगु वाषिर्काेत्सवया लसताय् बुधबाः अर्थमन्त्री विष्णु पौडेलं किसान क्रेडिट कार्ड व एपया शुभारम्भ यानादिल ।
बैंकं करिब २ दर्जन बुँज्यामिपिन्त किसान क्रेडिट कार्ड ईउँगु खः । अर्थमन्त्री विष्णुप्रसाद पौडेल व राष्ट्र बैंकया गभर्नर महाप्रसाद अधिकारीं बैंकपाखें कार्ड बुँज्यामिपिन्त लःल्हागु खः ।
कृषि विकास बैंकया प्रमुख कार्यकारी अधिकृत अनिल उपाध्यायं बैंक व बुँज्यामिपिं दथुई स्वाःपू अझ बल्लाइगु धयादिल । कृषि विकास बैंकयात दक्वसियाया पहुँचया बैंक यायेगु वय्कलं धयादिल ।
किसान क्रेडिट कार्ड व किसान एप छ्यलेत बुँज्यामिपिन्सं बैंकपाखें त्यासा कायेधुंका छुं ध्येबा कार्डय् लोड यायेवं बुँज्यामिपिनिगु प्रोफाइल तयार जुई ।
थ्व कार्डं कृषि विकास बैंकं काइगु त्यासा या थप किस्ता लिकायेत चेक ज्वना बैंक वनेमाःगु बाध्यता अन्त्य जूइगु बैंकं भलसाः काःगु दु ।
बैंक ध्येबा बिइगु बुथ गाँया थाय्थासय् तयेगु अले बुँज्यामिपिन्सं थःयात माःगु ईलय् त्यासा ध्येबा किसान क्रेडिट कार्डपाखें काय्फइगु बैंकं न्ह्यथनादिल ।
कृषि विकास बैंकया थ्यमथ्यं ब २७७ अर्ब ध्येबाया कर्जा, निक्षेप व ४६ अर्ब जमानत कारोबार यानाच्वंगु कृषि विकास बैंकया १५ लखः गाःहाकी त दु ।
