संवैधानिक आयोगय् सरकारं याःगु नियुक्ति बदरया माग यासें सभामुख अग्निप्रसाद सापकोटां थ्यन सर्वोच्च अदालत
लहनान्यूज | पोहेलागा अष्टमी ११४१, माघ २३ शुक्रवाः
![](https://www.lahananews.com/sites/default/files/SC%20copy.jpg)
संवैधानिक आयोगय् सरकारं याःगु नियुक्ति बदरया माग यासें सभामुख अग्निप्रसाद सापकोटां सर्वोच्च अदालतय् रिट निवेदन दर्ता याःगु दु ।
रिट निवेदनय् प्रधानमन्त्रीलिसें ३९म्हसित विपक्षी याःगु दु । प्रधानमन्त्री केपी शर्मा ओली, प्रधानन्यायाधीश चोलेन्द्र शमशेर राणा, राष्ट्रियसभाया अध्यक्ष गणेश तिमिल्सिना, मुख्यसचिव शंकरदास वैरागीलिसें संवैधानिक निकायय् नियुक्त जुया शपथ काःपिं ३२म्ह याना ३९म्हसित विपक्षी याःगु दु । उगु निवेदनय् सुनुवाइया लागि सर्वोच्चं वइगु आइतबाः तिथि क्वजिउगु दु ।
सभामुख सापकोटां संवैधानिक आयोगय् याःगु सिफारिस व नियुक्ति असंवैधानिक जूगु दाबी याना संवैधानिक परिषद््या पुस ५ गतेया को निर्णय बदर यायेत माग यानादिगु खः । नियुक्तिधुंका राष्ट्रपतिपाखें शपथ कया पदभार ग्रहण यायेधुंकुगु संवैधानिक आयोगया पदाधिकारीपिन्त ज्याः याकेमबिइत रिटय् माग याःगु दु ।
अथेहे वय्कपिनिगु नियुक्ति अथेस्तुंतया सर्वोच्च अदालतं)अन्तरिम आदेश जारी यायेमाःगु सभामुख सापकोटां रिटय् न्ह्यथनातःगु दु ।
कानूनी व राजनीतिक विवादया दथुई राष्ट्रपति विद्यादेवी भण्डारीं बुधबाः अख्तियार, निर्वाचन आयोग लिसेंया संवैधानिक निकायया पदाधिकारीपिन्त नियुक्त याःगु खः ।
उकिया प्यखेरं विरोध नं जुयाच्वंगु दु । वंगु ३० मंसिरया मुँज्याय् कोरम म्हो जुइधुंका सरकारं नायःलिसें बहुमत दुजःया उपस्थित जूसा संवैधानिक परिषद्या मूँज्या च्वनेफइगु अध्यादेश हःगु खः ।
प्रधानमन्त्री एवं परिषद्या नायः केपी शर्मा ओलीं उगुहे दिंया सनिलय तःगु मूँज्याय् राष्ट्रियसभाया नायः गणेशप्रसाद तिमिल्सिना व प्रधानन्यायाधीश चोलेन्द्र शम्शेर जबराया ब्वति दूगु खः ।
अथेहे सभामुख सापकोटा व विपक्षी दलया नेता शेरबहादुर देउवां मूँज्या बहिस्कार यानदीगु खः । संविधानअनुसार संवैधानिक निकायया पदाधिकारी नियुक्ति यायेबलय् संसदीय सुनुवाई समितिं अनुमोदन यायेमाःगु नियम दु । तर सिफारिसया ४५ दिंतक्क त क्वछिइ मफत धाःसा स्वतः अनुमोदन जुइगु संसदया संयुक्त मूँज्या व संयुक्त समितिया नियमावली यात हाँचागाना नियुक्ति बिउगु खः ।