सरकारं कोरोना भाइरसविरुद्धया खोप अभियान आःया लागि स्थगित याःगु दु ।

स्वास्थ्य मन्त्रालय अन्तर्गत इन्सिडेन्ट कमाण्ड सिस्टमया (आईसीएस) बैठकं खोप उपलब्ध मजू तलया लागि खोप अभियान स्थगित यायेगु निर्णय याःगु दु।

बुधवाः तक ५५ दँ स्वया अप्वोसिया नागरिकपिन्त खोप बिइगु ज्याझ्वः दुगु खःसा खोप उपलब्ध मजुतलया लागि स्थगित जूगु धका स्वास्थ्य मन्त्रालयया प्रवक्ता डाक्टर जागेश्वर गौतमं जानकारी बिःगु दु। स्वास्थ्य मन्त्रालयया नियमित प्रेस ब्रिफिङय् प्रवक्ता गौतमं खोप उपलब्ध जुइवं सूचं बिया हाकनं अभियान सुरु यायेगु धका धाःगु दु।

अग्रिम भुक्तानी याःगु खोप बच्छि जक वःगु व कोभ्याक्स सुविधाया खोप न लक्ष्य कथं मवःगु  नाप खोप वइगु सुनिश्चित मजूगुलि आःया लागि खोप अभियान स्थगित यायेगु निर्णयय् थ्यःगु धका स्वास्थ्य मन्त्रालयं धाःगु दु ।

Categorized in राष्ट्रिय