नेपालय् भ्रष्टाचार झन् अप्वःल
राम डंगोल | पोहेलाथ्व पुन्हि ११४१, माघ १५ बिहीवाः
![](https://www.lahananews.com/sites/default/files/TII.jpg)
नेपालय् वंगु दँसियां नं भ्रष्टाचार अप्वःगु दु । ट्रान्सपरेन्सी इन्टरनेशनल नेपालया सूची उगु तथ्यांक क्यंगु खः । १८गू देय् दथुया सार्वजनिक क्षेत्रया भ्रष्टाचारबारे विज्ञतय्गु अवधारणाया लिधंसाय् उगू सूची तयार जूगु खः ।
उगू सूचीं नेपाः भ्रष्टाचार जुईगु देय्या ११७गू थासय् लाःगु क्यंगु खः । वंगु दँय् नेपाःया ल्याः ३४ (११३ गू थासय्) लाःगु खः । थुकीं नेपाः भ्रष्टाचारं न्यनाच्वंगु हे खनेदूगु ट्रान्सपरेन्सी इन्टरनेशनलं धाःल ।
ट्रान्सपरेन्सी इन्टरनेशनलं थौं हलिंयंक छक्वलं भ्रष्टाचार अवधारणा सूचकांक (सीपीआई) सार्वजनिक याःगु खः ।
सूचकांकय् १०० ल्या धाःगु तसकं बाँलागू खःसा ० ल्या नं तसकं भ्रष्टाचार जुइगु क्यनिइ । थ्वः दँ नेपालं १०० ल्याःखय् ३३गू ल्या जक काय्त ताःलागु खः ।
सीपीआई २०२० या नेपालया नितिं थीथी ६गू संस्थाया सर्वेक्षणं सरकारया भ्रष्टाचार विरोधी प्रयास माःकथं मजूगु, सार्वजनिक थासय् भ्रष्टाचार व अधिकारया दुरुपयोग जूगु, सार्वजनिक पदाधिकारीपिन्त कारवाहीइ जुइगुलिइ म्हो जूगु, व्यापार व्यवसायखय् घुस काय्गु अथेस्तुं दूगु, सूचंलय् नागरिक पिनिगु पहुँच म्हो जूगु थेंजाःगु समस्या अथेंस्तं दूगु ट्रान्सपरेन्सीं धाःगु दु ।
विश्व बैंक, वल्र्ड इकोनोमिक फोरम, ग्लोबल इनसाइट, बर्टेल्सम्यान फाउन्डेशन, वल्र्ड जस्टिस प्रोजेक्ट र भीडीइएमलिसें ६गू संस्थां याःगु सर्वेक्षणया लिधँसाय् सूचकांकलिसेंया रिर्पाेट तयार याःगु खः
रिपोर्टय् भ्रष्टाचारया हुनिं कोभिड–१९ महामारी कजय् कायगू प्रयास कमजोर जूगु व लोकतन्त्रयात तकं लिछ्याःगु न्ह्यथनातःगु दु ।
सूचकांकय् दुपिं १८० देय्मध्ये डेनमार्क व न्युजील्याण्डं मुक्कं १००गू ल्याखय् ८८गू ल्याः हया दकले म्हो भ्रष्टाचार जुइगु देय्या नां तय्त सफल जूगु दु । साउथ सुडान व सोमालिया १२गू ल्यालिसें दकले अप्वः भ्रष्टाचार जुइगु देय्या नाम्ह सूचीकृत जूगु दु ।