खुलामञ्च याकन हे खुला जुइगु
शोभा श्रेष्ठ | पोहेलागा आमै ११४१, माघ २९ बिहीवाः
![](https://www.lahananews.com/sites/default/files/Khula-Manch.jpg)
येँ महानगरपालिकां खुलामञ्चयात खुला यायेगु कुतः याःगु दु । राष्ट्रिय महत्वया संरचना दरबार हाइस्कुलया निर्माण सम्पन्न जुइ धुकुगु व वीर अस्पताल न निर्माण ज्या क्वचाय् त्यगुलि येँ महानगरपालिकां उगु संरचना निर्माणया लागि तया तःगु निर्माण सामग्री व संरचना हटे याना खुला यायेगु कुतः सुरु याःगु दु ।
‘मेयरजुया निर्देशन कथयं आः दरबार हाइस्कुल व वीर अस्पताल प्रशासननाप निरन्तर सहलह याना च्वनागु दु’, येँ महानगरपालिकाया प्रमुख प्रशासकीय अधिकृत राजेश्वर ज्ञवालीं धयादीगु दु, ‘राष्ट्रिय महत्वया सरकारी संरचना निर्माण जइगु इलय् व निर्माण सामग्री तये थाय् मदुगु अवस्थाय् उमिस महानगरपालिका यात इनाप यागुलि अथे थाय् उपलब्ध याना बियागु खः। कोभिड–१९ या कहर लगायतका कारण संरचना निर्माणय् लिवागुलि खुलामञ्चय् तयातःगु निर्माण सामग्री हटे यायेत भचा लिबाःगु खः । दरबार हाइस्कुल निर्माण सम्पन्न जुया हस्तान्तरण जुइ धुकुगु दु सा वीर अस्पताल न निर्माण सम्पन्नया झ्वलय् दु ।
आ जिमिसं याकन हे खुलामञ्च खुला याये ।’ वःगु इलय् न्हिन्हि सतकय् जुइगु विशाल विरोध प्रदर्शन, ¥याली, आमसभा लगायतं महानगर दुने याःगु सतक अस्तव्यस्त जुयाच्वंगु व उकिया मार महानगरवासीपि फया च्वनेमाःगुलि थप ध्यानाकर्षण जुगुलि महानगरपालिकां याकन हे खुलामञ्च खुला यायेगु कुतः जुयाच्वंगु धका ज्ञवालीं धयादीगु खः । ज्ञवालीं प्राचीन ईलनिसे येँे खुला थाय् या पहिचान दुगु खुलामञ्चयात खुला याना त्वतेयेग जुइ धका धयादीसे भ्यु टावर निर्माणया लागि खुलामञ्च दुने अस्थायी रूपं सरे जुयाच्वंगु पुलागु बसपार्कयात न उचित व्यवस्थापन यायेगु धका ज्ञवालीं धयादीगु दु ।
अथेहे वीर अस्पतालया निर्देशक केदार सेन्चुरी न खुलामञ्चय् तयातइगु निर्माण सामग्री हटे यायेगु सकारात्मक दुगु धका जानकारी बियादीगु दु । ‘जिमिसं अन तयातइगु सामग्री हटे यायेगुलि सकारात्मक दु । निर्माणया ज्या अझ न ल्यः दनि अय्न ज्या याइपि कामदार अन हे च्वनाच्वगुलि भचा समस्या जुयाच्वंगु दु ’, वयकल धयादीगु दु,‘पार्किङ क्षेत्र जिमिस छवाः दुने हे खाली यायेत तयार दु । जि ठेकदार नाप सहलह याना च्वनागु दु। कोभिड, बजेट निकासाय् जुगु लिवागुलि ईलय् ज्या सम्पन्न यायेत भचा लिवागु खः।’
येँ महानगरपालिकाया नगर प्रहरी प्रमुख धनपती सापकोटां वीर अस्पताल व दरबार हाइस्कुल प्रशासन नाप निरन्तर छलफल जुयाच्वगु दु धयादीसे गुलि फु उलि याकन हे खुला यायेगु तयारीमा दु धका धयादीगु दु।
Categorized in राष्ट्रिय