नेपालभाषा आन्दोलनया धिसिलाःगु थां गणेश साय्मि
नृपेन्दलाल श्रेष्ठ | दिल्लागा नवमी ११४३, असार २६ मंगलवाः
अभिनन्दन याय्माःम्ह मेम्ह छम्ह भाषासेवी, सम्मान मयासें मगाःम्ह नेपालभाषा ख्यःया सांस्कृतिक योद्धा सम्मानित, अभिनन्दित जूगु दु । संस्था विशेष स्वयां नागरिक स्तरं अभिनन्दन याःगु दु । नेपालभाषा लिसें नेवाः कलाकारिता, साहित्य क्षेत्रयात ताः ई न्ह्यवःनिसें निरन्तर रुपं विशिष्ट योगदान बियावःम्ह वरिष्ठ कलाकार गणेश साय्मियात नागरिक अभिनन्दन याःगु खः । नेपालभाषा ख्यलय् थीथी संघसंस्थाय् आवद्ध जुयाः सामाजिक क्षेत्रय् बियावःगु ज्वः मदुगु योगदान, नेपालभाषाया कलाकारिता ख्यः उकीसनं विशेष यानाः ख्यालः विधाय् चान्हि मधाःसे क्यनादीगु सक्रियता व साहित्य ख्यलय् बियादीगु योगदानया उच्च मूल्याकंन यासें साय्मियात नागरिक स्तरं अभिनन्दन याःगु खः ।
नांजाःम्ह वरिष्ठ कलाकार राजेन्द्र्र शाक्यया कजिसुइ गठीत ५५ दुजःया नागरिक अभिनन्दन समारोह समितिं वंगु शनिबाः छगू भव्य सभाया आयोजना यासें कलाकार साय्मियात नागरिक अभिनन्दन याःगु खः । ज्याझ्वलय् साय्मियात जनकवि दुर्गालाल श्रेष्ठं दोसल्लां न्यय्केगुलिसें हनापौ लःल्हानादिल सा समितियापाखें छगू लख ७५द्वः तका राशी सम्मान नं ब्यूगु खः । उगु हे ज्याझ्वलय् नेपालभाषा ख्यःया थीथी संघसस्थां नं वय्कःया हनापौ देछासें सम्मान याःगु खः । लोककवि राजभाइ जकःमिं कलाकार साय्मिया बारेय् च्वयातःगु चिनाखँ वाचन यानाः सम्मान देछानादीगु खः।
नुगःखँया झ्वलय् जनकवि दुर्गालाल श्रेष्ठं साय्मियात छम्ह नासलं ल्यूम्ह ख्यालःम्वःया उपमा ब्युसें गणेश साय्मि थुज्वःम्ह भाषासेवी दत्तले नेवाः भाय् नं म्वानाच्वनी धयादिल । नेपालभाषा मंकाः खलःया न्वकू मल्ल के सुन्दरं साय्मियात तसकं इमान्दारम्ह मनू धासें नेपाल सम्वत ११०२ स बाजं खलःयात समयबजि नकागु इलय् साय्मिं दांभरिं कथं चुस्त दुरुस्त हिसाब तःगु जक मखसें ल्यं दनिगु चि, चिकं आदिया ल्याःचाः तकं बियादीगु लुमंकादिल । ख्यालि जुजु मदनकृष्ण श्रेष्ठं कलाकार साय्मिलिसे स्वानाच्वंगु पुलांगु ईयात लुमंकाः न्ववानादिल ।
समारोह समितिया नायः राजेन्द्रमान शाक्य, वरिष्ठ संगीतकार अमर राज शर्मा राजोपाध्याय्, येँ महानगरपालिका वडा नम्बर १७ या वडाध्यक्ष नवीन मानन्धर, वरिष्ठ पत्रकार सुरेश किरण मानन्धरलिसें नं कलाकार साय्मिया व्यक्तित्व व योगदानया बारे चर्चा यानादीगु खः । सम्मान लःल्हानाकाय्धुंकाः थःगु नुगः खँ तय्गु झ्वलय् कलाकार साय्मिं थुगु सम्मानं थः तसकं गौरवान्वित जूगु धयादीगु खः ।
कलाकार साय्मिं नेपालभाषा ख्यःया यक्व क्षेत्रय् थीथी कथं योगदान बियादीगु दु । विशेष यानाः वय्कःया ख्यालः विधाय् म्हस्यू । थीथी ख्यालकय् कलाकार जुयाः म्हितेगु लिसें निर्देशन नं यानादीगु दु । वय्कलं निर्देशन यानादीगु तःगु हे ख्यालकं न्हाप, ल्यू, लियांल्यू व हःपाः सिरपाःत त्याकूगु दु । विशेष यानाः वि.सं. २०२२ सालय् रेडियो नेपालं नेपालभाषाया समाचार दिकूबलय् न्ह्याःगु भाषा आन्दोलनं वय्कःयात छम्ह भाषिक योद्धा कथं न्ह्यःने हःगु खः । उगु इलय् जुइगु थीथी साहित्यिक सांस्कृतिक सभाय् वय्कलं कविता वाचन याय्गु जक मखसें, थःगु कविता मेपिन्त वाचन याकेगु व मेपिन्त तक नं कविता वाचन याकेगु नितिं प्रेरित यानादिल । २०३३ सालय् ख्यालि जुजु मदन कृष्ण श्रेष्ठ, रामशेखर नकःमि, श्रीकृष्ण अणु दुगु ’मुना सः’ नांयागु कलाकारतय्गु संस्थाय् आवद्ध जुयाः निर्दलीय पञ्चायती व्यवस्था विरुद्धया राजनीतिक चेतना जागृत याय्गु, प्रजातन्त्रया पक्षय् सः तयाः मनोरञ्जनात्मक ज्याझ्वःत याय्गु नं यानादिल ।
थौंया दिनय् नेपालभाषा मंकाः खलःया दबूछेँ धस्वाय्धुंकूगु दु । उकिया नितिं नं साय्मिया तःधंगु योगदान दु । तत्कालीन इलय् मंकाः खलःयाके छेँ दनेत जग्गा व धेबा नितां मदुनिबलय् चन्दा म्हय्गुलिसें यःमरि पुन्हिकुन्हु त्यःछिंत्यः फ्वनाः धेबा मुंकूगु व उकिं जग्गा न्याःगु खः । उगु इलय् साय्मिया सक्रियता उगु ईया मंकाः खलकय् वय्कःया सहकर्मीपिन्सं थौंतकं लुमंकेगु याः । वय्कः साय्मि मंकाः खलःया संस्थापक दांभरिं तकं खः ।
