प्रिमियर लिग ः म्यान सिटी व लिभरपुल त्यात, चेल्सी बुत
चिल्लागा सप्तमी ११४१, चैत्र २२ गते आइतबाः
![](https://www.lahananews.com/sites/default/files/41301700-9430431-image-a-9_1617476303230.jpg)
इंग्लीश प्रिमियर लिग फुटबलय् म्यान्चेस्टर सिटी व लिभरपुल त्याबलय् चेल्सी बूुगु दु । वंगु चान्हय् लेष्टर सिटीयात उमिगु हे मैदानय् २–०या गोल अन्तरं बुका म्यान्चेस्टर सिटीं उपाधि संभावना थप बल्लाकुगु खः ।
लेष्टर विरुद्धया कासाय् म्यान सिटीयात त्याकेत बेन्जामिन मेन्डी व ग्याब्रियल जिससं छगू छगू गोल याःगु खः ।
प्रिमियर लिगया हे मेगु कासाय् लिभरपुलं आर्सनलयात ३–०या गोल अन्तरं बुकल । आर्सनलयात उमिगु हे मैदानय् त्याकेत लिभरपुलया डिएगो योटां निगू लिसें मोहोमद सालाहं छगू गोल याःगु खः ।
वंगु चान्हय् चेल्सी धाःसा वेष्ट ब्रोमलिसे ५–२गूया गोल अन्तरं बुइमाःगु दु । जर्मन प्रशिक्षक थोमस टुकेलया नेतृत्वय् चेल्सीया थ्व न्हापांगु हार खः ।
प्रिमियर लिगया हे मेगु कासाय् लिड्स युनाईटेडं शेफिल्ड युनाईटेडयात २–१गूया गोल अन्तरं त्याकुगु दु । वंगु चान्हय्सिया कासालिपा प्रिमियर लिगया ल्याः धलःखय् ३१गु कासां ७४गू ल्याः मुंगु म्यान्चेस्टर सिटी शिर्ष थासय् यथावत दु ।
लिगया उपाधि त्याकेत आः उमिसं ल्यं दूगु ७गू मध्ये ४गू कासा त्याकुसा माक्वः जुइ ।
Categorized in कासा