थौं प्रजातन्त्र दिवस, निषेधया राजनीति मयायेत पूर्व जुजु ज्ञानेन्द्र शाहया हसना
लहनान्युज | सिल्लाथ्व सप्तमी ११४१, फागुन ७ शुक्रवाः
![](https://www.lahananews.com/sites/default/files/prajatantra%20diwas.jpg)
थौं प्रजातन्त्र दिवस स्वदेश अले विदेशस्थित थीथी नियोगय् थीथी ज्याझ्वः यानाः हनाच्वंगु दु ।
जनक्रान्तिया माध्यमं राणाशासन न्हंकाः देशय् प्रजातन्त्र घोषणा जूगु दिंया हनाय् थीथी ज्याझ्वः यानाः थुगु दिवस हनी ।
प्रजातन्त्रया हे जगय् लोकतन्त्र जुयाः देशय् आः संघीय लोकतान्त्रिक गणतन्त्रात्मक शासन व्यवस्था स्थापना जूगु दु ।
२००७ सालय् जुजु त्रिभुवन व राजनीतिक दलतय् मंकाः कुतलय् सच्छि व ४ दँया जहाँनिया राणाशासन न्हंकाः प्रजातन्त्र स्थापना जूगु खः ।
प्रजातन्त्र स्थापनाया लागिं जूगु संघर्षय् शुक्रराज शास्त्री, दशरथ चन्द, धर्मभक्त माथेमा व गङ्गालाल श्रेष्ठं विसं १९९७ माघय् बलिदानी बियादीगु खः ।
प्रजापरिषद् नामं राजनीतिक दल भूमिगत रूपं स्थापना यानाः प्रजातन्त्र स्थापनाया लागिं जनताय् जागरण हःगु द्वपनय् वय्कःपिन्त तत्कालीन राणा शासकतय्सं मृत्युदण्ड ब्यूगु खः ।
नेपाली राष्ट्रिय कांग्रेस व नेपाल प्रजातन्त्र कांग्रेसया २००६ सालय् एकीकरण धुंकाः दयेकूगु नेपाली कांग्रेसया संस्थापक नेता बिपी कोइरालाया नेतृत्वय् जूगु सशस्त्र व निर्णायक आन्दोलनं नेपालय् २००७ साल फागुन ७ गते प्रजातन्त्र स्थापना जूगु खः ।
थ्व हे दथुइ, प्रजातन्त्र दिवसया लसताय् राष्ट्रपति विद्या भण्डारी, उपराष्ट्रपति नन्दबहादुर पुन, प्रधानमन्त्री केपी शर्मा ओली लिसें थीथी दलया नेतातय्सं भिंतुना बियादीगु दु ।
वय्कःपिन्सं जनताया संघर्षया बलिदानीं चूलाःगु उपलब्धीयात सकसिनं संरक्षण यायेमाःगु धयादीगु खः ।
थ्वहे लसताय् पूर्व जुजु ज्ञानेन्द्र शाहं निषेधया राजनीति याइपिन्त चेतावनी बियादीगुदु ।
७१क्वःगु प्रजातन्त्र दिवसया लसताय् हसना जारी यासें पूर्व जुजु शाहं नेपाल जनता व जुजुया सहमतिं खडा जूगु व थुकिया अस्तित्व रक्षा नं सहमतिं जक जुइगु यथार्थया अवज्ञां निषेध व विभेदया राजनीति जुयाच्वंगु धयादिल ।
वय्कलं देय् न्हियान्हिथं जटिलताय् तक्यनावंगु महसुस आम नेपाःमिं यानाच्वंगु धासें सकसिनं मातृभूमिया पवित्र चा छातीइ तयाः आत्म समीक्षा यायेगु ई वःगु न्ह्यथनादिल ।
पूर्व जुजु शाहं जनताया आस्था, मनंतुना व जनभावना अन्ततः अमर जुइगु धासें थुकियात हुइत स्वयां हुइ मफइगु नं धयादीगु दु ।
Categorized in राष्ट्रिय