नेपाल विद्युत प्राधिकरणं अनलाइनपाखे महशुल भुक्तानी यागु इलय् थप सेवा शुल्क लगे जुइगु व्यवस्था याःगु दु ।

५०० रुपैयाँ तक मतया महशुल भुक्तानी याये वलय्  शुल्क लगे मजुइगु तर, ५०१ रुपैयाँ स्वया अप्वो ५ लाख तक याःगु बिल भुक्तानीइ प्रतिकारोबार ५ रुपैयाँ सेवा शुल्क लगे जुइगु प्रस्ताव हःगु खः ।

थ्व स्वया न्ह्यः प्राधिकरणं अनलाइन भुक्तानीइ छु न शुल्क कायेत सेवा प्रदायकयात अनुमति बिःगु मदु । तर, सेवा प्रदायकं थथे शुल्क काये दयेमाःगु माग याना वयाच्वंगु खः।

प्राधिकरणं आः भुक्तानी सेवा प्रदायकयात अनलाइन भुक्तानीबापत शुल्क कायेगु अनुमति बिइत्यःगु खः ।

थुकिइ उपभोक्तायात अनलाइन भुक्तानी यायेगु निरुत्साहित व जोखिम जुइ धका प्राधिकरणया अधिकारीपिन्स धाःगु दु । प्राधिकरणं छगु सूचं जारी यासे थज्यागु सेवा शुल्कया शर्त पालना यायेगु कथं मतया बिल भुक्तानी यायेगु सेवा प्रदायकया रुपय् छनोट जुइत  प्रस्ताव आह्वान याःगु दु।

प्राधिकरणं प्रतिकारोबार न्यातकाया प्रस्ताव याःसा कम्पनीं उगु स्वया कम सेवा शुल्क प्रस्ताव याये फइ। 

Categorized in राष्ट्रिय