“मिसेस नेवाः ११३८” जुइगु
नृपेन्द्रलाल श्रेष्ठ | अनलागा पंचमी ११३८ ( जुन ३ २०१८ )
![](https://www.lahananews.com/sites/default/files/1_32.jpg)
देय्न्यंकया नेवाः मिसापिन्त जागरण व सबलीकरण याय्गु तातुनां के.टि.एम. मिडिया एण्ड इभेन्ट्सपाखें नेवाः समुदायया इहिपाः जुइधुंकूपिं मिसापिन्त लक्षित यासें थीथी शीर्षक व विषयस अनौपचारिक शिक्षा तालिम व प्रतिस्पर्धाया तयारी जुयाच्वंगु जानकारी छगू पत्रकार सम्मेलनय् ब्यूगु दु ।
थ्व हे झ्वलय् नेवाः समुदायया इहिपाः मजूपिनिगु मिसा वर्गया ल्याय्म्ह पुस्तायात लक्षित यासें ‘न्हापांगु मिस नेवाः आइडल’ याय्गु नं उगु पत्रकार सम्मेलनय् जानकारी ब्यूगु दु ।
यलया लगनखेलय् च्वंगु ललितपुर मलय् जूगु उगु पत्रकार सम्मेलनय् ‘मिसेस नेवाः २०१८’या फर्म इनेज्या जेष्ठ २० गतेनिसें याःगु जानकारी ब्यूगु दुसा अडिसन असार १५ व १६ गते जुइगु जानकारी नं ब्यूगु खः ।
अथेहे ट्रेनिङ श्रावण ३ गतेनिसें ललितपुर मल लगनख्यलय् जुइगु व ग्राण्ड फिनाले भदौ १ गते येँया राष्ट्रिय नाचघर जमलय् जुइगु जानकारी नं उगु पत्रकार सम्मेलनय् ब्यूगु दु ।
निक्वःगु “मिसेज नेवाः ११३८” जुइत्यंगु उगु ज्याझ्वःया प्रचारात्मक ज्याझ्वःकथं जूगु पत्रकार सम्मेलनय् रेणुका बज्राचार्यं प्रेस विज्ञप्ति ब्वनाः न्यकांदीगु खः ।
ज्याझ्वलय् न्हापांम्ह मिसेज नेवाः २०१७ रेजिना शाक्य व रनर अप सरीता नेम्कुल प्रधानं थगुने कासाय् ब्वति कयाः थःपिनिगु न्हूगु हे म्हसीका दय्केत ताःलाःगु लिसें न्हू न्हू खँत सय्केगु ह्वःताः चूलाःगु धयादिल ।