‘हेमबहादुर मल्ल सम्मान’ उमेश प्रसाद मैनालीयात
लहनान्युुज | अनलाथ्व तृतिया ११३८ (मे १८ २०१८)
![](https://www.lahananews.com/sites/default/files/re.jpg)
साल्ट ट्रेडिङ कर्पोरेशनया पुलांम्ह अध्यक्ष हेमबहादुर मल्लया नामं नीस्वनातःगु ‘हेमबहादुर मल्ल सम्मान’ वि.सं. २०७० सालया निंतिं लोकसेवा आयोगया अध्यक्ष व पुलांम्ह मुख्य सचिव उमेश प्रसाद मैनालीयात छगू ज्याझ्वःया दथुइ उपराष्ट्रपति नन्द बहादुर पुनः सम्मानपत्र व नगद सिरपाः लःल्हानादीगु खः ।
साल्ट ट्रेडिङं नगद सौजन्यय् नेपाल जनप्रशासन संघपाखें बिया वयाच्वंगु थुगु सिरपाः निगू लाख तका व सम्मान पत्र खः ।
उगु ज्याझ्वलय् न्ववानादिसें साल्ट ट्रेडिङया अध्यक्ष लक्ष्मीदास मानन्धरं कर्पोरेशनं सामाजिक दायित्व अन्तर्गत ३६ दँ तक थीथी पदय् च्वनाः ज्या यानाः साल्ट ट्रेडिङयात बांलाःगु अवस्थाय् थ्यंकादीम्ह कुशल प्रशासक व व्यवस्थापक हेमबहादुर मल्लया नामय् थुगु सम्मान नीस्वनातयागु खँ कनादिल ।
लोकसेवा आयोगया अध्यक्ष मैनालीं सम्मान लःल्हाना कयादिसें कर्मचारी प्रशासन सम्बन्धी ‘कि नोट’ न्वचु नं बियादीगु खः ।
वंगु झिदँ न्ह्यवनिसें बिया वयाच्वंगु थुगु सिरपा आतकं प्रशासकत केदारभक्त माथेमा, महावीर पुन, डा भगवान कोइराला, चाँदनी जोशी यात बीधुंकूगु दु ।
न्हापा छगु लखतक बियावया च्वंगु थुगु सिरपा थुगुसि निसें निगु लखतक याःगु खः ।