‘हस्तकलायात प्रर्वद्धन यायेत मेला ’
लहनान्युज | पोहेलागा त्रयोदशी ११३८ (फ्रेअवरी २ २०१९)
![](https://www.lahananews.com/sites/default/files/photo%2016.jpg)
यल महानगरपालिका – १६ वडां थ्व हे वइगु १३ निसेें चैत्र १७ तक हस्तकला व सांस्कृतिक मेला जुइगु धका यल मनपा १६ वडाया वडाअधक्ष्य निर्मलरत्न शाक्यं थौं छगु पत्रकार सम्मेलनयासे हस्तकला मेलाया जानकारी बियादीगु खः ।
थौंया पत्रकार सम्मेलन नाप विश्व कला परिषद्ं यलयात विश्वया ३५ औं हस्तकला नगरी घोषणा जुगुया लसताय् थुगु मेलायाबारे सुझाव संकलन यायेगु नाप सरोकारवाला तयेत छगु भेला न सतगु धका वडाअधक्ष्य शाक्यं धयादीगु खः । नाप मेलाया अवधारणाबारे वडाअध्यक्ष शाक्य,ज्याझ्वया बारे रेणुका बज्रचार्यं थःथःगु धारणा तयादीगु खः ।
उगु ज्याझ्वलय् नेपाल हस्तकला महासंघया निर्वतमान अध्यक्ष धर्मराज शाक्य, ललितपुर हस्तकला संघया अध्यक्ष विसरामसिंह महर्जन, नेपाल हस्तकला महासंघया सदस्य प्रदीप शाक्य संघया सदस्य सुभानन्द धाख्वा,ललितपुर उद्योग वाणिज्य संघया अध्यक्ष कृष्णलाल महर्जन ,राष्ट्रिय उपभोक्ता मञ्चया अध्यक्ष प्रेमलाल महर्जन, ललितपुर हस्तकला संघया पूर्वअध्यक्ष रुपरत्न शाक्य, समाजसेवी नाप उद्योगी मोतिलाल शिल्पकार, वडा सदस्यपिं सुप्रभा शाक्य, विजय महर्जनपिन्सं नेपाल भाषा, संस्कृति, हस्तकला व पर्यटन प्रर्वद्धन यायेत ग्वाहालि जुइगु बिचाः तयादिगु खः ।
विश्वसम्पदा सूचीकृत कृष्ण देगः निसें हिरण्यवर्ण महाविहार (गोल्डेन टेम्पल), यशोधर महाविहार, रत्नाकर महाविहार लगायत लिच्छिवकालीन बौद्ध विहार, थी थी मूर्त, अमूर्त सम्पदा न थ्व हे वडा दु । नाप कार्तिक नाच, अष्टमातृका नाच थेजाःथु मल्लकालीन नाच न थ्व हे वडा जुया वयाच्वंगु खः ।‘थ्व हे स्वया यल १६ वडां सांस्कृतिक, हस्तकलाया विकास यायेगु आज्जु तयागु खः धका वडाअध्यक्ष शाक्यं थौं पत्रकार सम्मेलनय् जानकारी बियादीगु खः ।