‘सतक विस्तार स्थानीयया सहमतिया आधारय्’
लहनान्यूज | सिल्लागा द्वितीया ११३७ (फेब्रुअरी १२ २०१७)
![](https://www.lahananews.com/sites/default/files/tamrakar.jpg)
थौंकन्हय् तिनि हे यलय् जिल्लाय् नियुक्त जुयावःम्ह प्रमुख जिल्ला अधिकारी दिपक काफ्लें सतक बिस्तारया ज्या स्थानीय सहमतिया आधारय् न्ह्याइगु धयादीगु दु ।
ताम्रकार समाजं ग्वसाः ग्वःगु जातीय समाज, टोल सुधार समिति, स्थानीय प्रशासन व प्रहरी प्रशासनया अधिकृततलिसेया अन्तरक्रियाय् नवासें प्रजिअ काफ्लें शान्ति व सुरक्षाया सुनिश्चितताया लागी सुशासन जुइमाःगु धयादिल । अथेहे पूर्व प्रमुख जिल्ला अधिकारी ऋषिराम शर्मां जनताया अपेक्षा व मनंतुना प्रशासनं पूवंकेमाःगु व जातिय समाजलिसे स्वापू क्वात्तुकेफःसा जकः कार्यकाल सफल जुइगु बिचाः प्वंकादिल ।
ज्याझ्वलय् लसकुस यासें समाजया नायः रबिन्द्रराज ताम्रकारं जनमानसय् थ्व इलय् प्रहरी प्रशासनयात स्वयेगु दृष्टिकोणय् ह्यूपा वःगु सकारात्मक पक्ष खःगु धयादिल । थुकियात निरन्तरता बीमाःगु खँय् नायः ताम्रकारं बः बियादिल ।
उगु हे ज्याझ्वलय् वरिष्ठ प्रहरी उपरिक्षक पिताम्बर अधिकारीयात यल जिल्लाय् शान्ति, सुरक्षा, अपराध नियन्त्रणय् विशेष भुमिका निर्वाह याःगु धकाः सम्मान याःगु खः । अधिकारीयात समाजया नायः ताम्रकारं सम्मान यानादीगु खः ।
ज्याझ्वलय् यल जिल्लाया सहायक प्रमुख जिल्ला अधिकारी कृष्णप्रसाद आचार्य, महानगरीय प्रहरी प्रभाग, मंगलबजारया प्रमुख, प्रहरी निरिक्षक प्रकाश थापा, पुल्चोकया प्रमुख, प्रहरी निरिक्षक गोविन्द पन्थी नापं ज्यापु समाज, बौद्घबिहार संघ, राजोपाध्याय समाज, कपाली समाज, राजकर्णिकार समाज, बाराही समाज, जोशी समाज, बाद्यकार समाज, चक्रवर्ति टोल सुधार समिति, तिच्छुगल्ली टोल सुधार समिति, नेवाः पत्रकार राष्ट्रिय दबूया प्रतिनिधिपिंन्स जिज्ञासाया लिसें सल्लाह, सुझाव ब्यूगु खः ।
Categorized in राष्ट्रिय