‘पत्रकारया मिखाय् लोक संगीत’ सांगितिक ज्याझ्वः
लहनान्युज | सिल्लागा चौथि ११३८ (फ्रेअवरी ४ २०१८)
मध्यपुर थिमि नगरपालिका, सिक्किम नेवाः गुथि, संस्कृति सम्वर्दनको लागि युवा नेपालया मंकाः ग्वसालय् थौं थिमिया यचु पार्टी भेन्यूइ ‘पत्रकारया मिखाय् लोक संगीत’ विषयक ब्वज्या नापं सांगितिक ज्याझ्वः जूगु दु ।
थीथी इलय् झी जःलाखःला देय् भारतया सिक्किम राज्यय् वनाः लांलां तक्क च्वना नेवाः तजिलजि दुनेया भाय्, लिपि, बाजं, प्याखं, नसाँ त्वंसा, संस्कार आदिया बारे स्यनेकने यानाः झायादीपिं भाजु मय्जुपिं व संगीत ख्यःया थीथी हस्तिपिन्त हनेगु ज्या जूगु खः ।
उगु ज्याझ्वलय् मूपाहाँ कथं सत्यमोहन जोशी झायादीगु खःसा विशेष पाहाँ कथं सिक्किम नेवाः गुथिया नायः दिल कुमार प्रधान व मध्यपुर थिमिया मेयर मदन सुन्दर श्रेष्ठ झायादीगु खः ।
उगु ज्याझ्वलय् विभिन्न इलय् सिक्किमय् वनाः थीथी विधा स्यनाबियादीपिं चिनिया शाक्य, सुभाषराम प्रजापति, सन्त प्रजापति, कृष्ण बहादुर प्रजापति, विष्णुबहादुर प्रजापति, निलकृष्ण प्रजापति, बालमुकुन्द प्रजापति उल रत्न मानन्धर, शर्मिला महर्जन, शरद कसाः, जुजुमान महर्जन, अनिल स्थापित, बुद्धलक्ष्मी महर्जन, रत्नकेशरी प्रजापति, बिद्याकेशरी प्रजापति, समिर प्रजापति, नविना दुवाल, बाबुराजा राजोपाध्याय, गणेशराम लाछि, लक्ष्मण गमाल, मेनुका ताम्राकार, शिव कुमार श्रेष्ठपिन्त हंगु खः ।
अथेहे संगीत ख्यःया राम कृष्ण दुवाल, रामेश श्रेष्ठ, मनराजा नकःमि, पवित्र कसाःपिन्त नं दोसल्लां न्ययेका हंगु खः ।
ज्याझ्वलय् रत्नशोभा महर्जन, पवित्र कसाः, सरिता शाही, रामकृष्ण दुवाल, रामेश श्रेष्ठपिसं लोकंह्वागु थीथी म्येत हालाः न्यंकादीगु खः ।
सन्तोष प्रजापतिया सभाधक्ष्य जुगु उगु ज्याझ्वलय् शरद कसाः व गणेश राम लाछिं न्ह्याकादीगुु खः ।
बुखँ नेवाः सुचना केन्द्र
किपा राजेन्द्र रञ्जित