‘जिं महाअभियोगया विरोध यानागु मखु’
लहनान्यूज सम्वाददाता | कौलागा त्रयोदशि ११३६ (अक्टोबर २८ २०१६)
माओवादि केन्द्रपाखेंया सांसद् रुपा महर्जनं थम्हं गबलें नं महाअभियोगया विरोधय् न्वःमवानागु धयादीगु दु ।
लहनान्यूजलिसे खँ ल्हासें सांसद् महर्जनं अख्तियार दुरुपयोग अनुसन्धान आयोगया प्रमूख आयुक्त लोकमान सिंह कार्कीयात महाअभियोग प्रस्तावया विपक्षय् थः मदुगु स्पष्ट यानादिल । थःगु खँयात हीकाः थीथी संचार माध्यमं थःत महाभियोगया विपक्षी कथं थनाब्यूगु वयकलं धयादिल ।
थम्हं महाभियोगया प्रस्ताव गुकथं वल, व प्रक्रियाया जक विरोध यानागुलिइ संचार माध्यमं उकियात हीकाः थःत महाभियोगया हे विपक्षी कथं थनाब्यूगु महर्जनया धापू खः ।
महाभियोग प्रस्ताव वये हे माःगु अवस्था खःसां माःकथं दलतलिसे सहलह मयाःगु खँय् धाःसा थःगु असन्तुष्टि दुगु महर्जनं स्पष्ट यानादिल । थः सत्ता साक्षेदार दललिसे हे सहलह मयाःसे उकथं प्रस्ताव हःगु प्रक्रिया थःत मयःगु वयकः महर्जनया धापू खः ।
छुं दिं न्ह्यः महर्जनं महाभियोग प्रस्तावया विषयस सामाजिक संजालय् थःगु बिचाः पोष्ट यानाद्यूगु खः । व हे पोष्टया लिधंसाय् महर्जन महाभियोग प्रस्तावप्रति असन्तुष्ट धइगु ल्याखं थीथी न्यूज पोर्टलय् न्यूज पिदंगु खः ।
Categorized in राजनीति
