‘आर्यमञ्जुश्री नामसंगीति गाथा’ सफू पिदन
लहनान्युज | पोहेलाथ्व दशमी ११४४, माघ ६ शनिवाः
![](https://www.lahananews.com/sites/default/files/News%20photoa.jpg)
नामसंगीति वाचन गुरु चित्रवीर बज्राचार्यया न्हापांगु ज्याःजंकुया लसताय् “आर्यमञ्जुश्री नासंसंगीति गाथा (नेपालभाषा अनुवादसहित) व धर्मश्री मित्र कथा” सफू प्रकाशन यानाः नामसंगीति वाचन यानादीपिन्त दोहलपाकथं देछाल ।
यलया बालिफलय् च्वंगु अशोक पार्टी प्यालेसय् गुरु बज्राचार्यया ५०० म्हं मल्याक शिष्यपिंनाप नामसंगीति पाठ जूगु थुगु ज्याझ्वलय् गुरु बज्राचार्यया कायपिं सुरजवीर, संजिववीर, सुदिजवीर व भौपिं रमा र रिजु बज्राचार्यं थुगु सफू पिथनादीगु खः । सफूया देबः किपातय् वरिष्ठ चित्रकार लोक चित्रकारं च्वयादीगु नामसंगीति द्यःया किपातं छायपियातःगु दुसा थुगु सफू खेमराज शाक्यं सम्पादन यानादीगु खः ।
थुगु सफुतिइ पण्डित बद्रीरत्न बज्राचार्यं च्वयादीगु स्वयम्भू पुराणया षष्टम अध्यायय् च्वंगु धर्मश्री मित्रया बाखं, बौद्ध अध्येता मीनबहादुर शाक्यं सम्पादन यानादीगु नामसंगीति नेपालभाषा अनुवादया षटचक्र अनुशंसा व गुरु बज्राचार्य बःचाहाकःगु जीवनी दुथ्यानाच्वंगु जुल ।
ज्याझ्वलय् बज्राचार्यया गुरु नेपाल परम्परागत बौद्धधर्म संघया अध्यक्ष प्रा.डा. नरेशमान बज्राचार्ययात गुरुपूजा यासें हनापौ देछाःगु खःसा नेपाल परम्परागत बौद्धधर्म संघ, व संघया महासचिव दिनेश शाक्य व सम्पादन खेमराज शाक्यया नं सुभाय् पौ देछाःगु खः । नामसंगीति ब्वनेगु परम्पराय् न्ह्यज्यानाच्वंपिन्त देछाःसें थुगु सफू पिथनागु गुरु बज्राचार्यया काय् सञ्चारकर्मी सुरजवीर बज्राचार्यं कनादिल ।
ज्याझ्वलय् नेपालभाषा एकेडेमीया चान्सलर यज्ञरत्न धाख्वा, हिरण्यवर्ण महाविहार विहार सुधार समितिया नायः पुष्पराज बज्राचार्य, नेपाल परम्परागत बौद्धधर्म संघया महासचिव दिनेश शाक्य, पद्मावती वचत तथा ऋण सहकारी संस्थाया नायः नेमवीर शाक्यं नं भिंतुना देछानादीगु खः ।
गुरु बज्राचार्य वंगु पुस २८ गते ७७ बर्ष, ७ महिना, ७ दिन, ७ घडी, ७ पला पूवंगु ल्याखं वय्कःया जहान ज्ञानीदेवी बज्राचार्यनाप परम्पराकथं ज्याःजंकु याःगु खः । यलया हिरण्यवर्ण महाविहार क्वाःबहाः (गोल्डेन टेम्पल) या वीशस्थविर आःजु गुरु चित्रवीर बज्राचार्य ४ दशकनिसें नामसंगीति वाचनय् सक्रिय जुयाच्वनादीम्ह खः । नेपाल परम्परागत बौद्धधर्म संघया ग्वसालय् आर्यमञ्जुश्री नामसंगीति पर्व न्ह्यासांनिसें त्वाःत्वालय् नामसंगीति हालेगु स्यनाच्वनादीम्ह वय्कःया नामसंगीति परम्परा प्रवर्द्धनय् महत्वंजाःगु भूमिका म्हितादीगु दु ।