सगरमाथाय् सत्यमोहनया किपाः ब्वय्केगु कल्पनाया तयारी
नृपेन्द्रलाल श्रेष्ठ
ताः ई म्वाय्गु स्वयांं नं म्हो म्वाय्गु, तर अर्थपूर्ण रुपं म्वाय्गु धइगु सिद्धान्तयात ज्वनाः वयाच्वनादीम्ह नेवाः म्ह्याय्मचा खः कल्पना महर्जन । थ्व हे सिद्धान्तयात नालाः हे जुइ, वय्कः न्हापांखुसी हलिंया दकलय्तःजाःगु च्वापुगुँ सगरमाथा गय्त ताःमलाःसां नं निक्वःखुसी धाःसा सगरमाथा च्वकाय् थ्यंकाः हे त्वःतादिल । उकिं वय्कः कल्पना महर्जनयात सगरमाथा आरोहीया रुपय् सकलसिनं म्हसिल ।
उलि जक मखु, निक्वः खुसी सगरमाथा गय्त वनादीगु इलय् नं हिमालय् हे म्ह मफूगु खः, अय्नं तःधंगु आँट यानाः साहास यानाः सगरमाथा गया हे त्वःतादिल । जीवनयात छगूकथं दाउलय् तयाः हे सगरमाथा गयादीम्ह कल्पना महर्जनयात नेवाः समाजं यक्व हे सम्मान यात । यक्व संघ संस्थातपाखें वय्कःयात हन । कल्पना महर्जन छम्ह नेवाः मिसा मचा जुयाः नं सगरमाथा गय्त ताःलाःम्ह ब्यक्तित्व धकाः लुँआखलं थःगु नां च्वकेत ताःलाःगु खः । आः वयाः वय्कलं न्हूगुकथंया योजना दय्कादीगु दु । न्हापा नेपाःपाखें सगरमाथा गयादीगु खःसा आः चीनया तिब्वतपाखें सगरमाथा गय्गु कथंया तःधंगु म्हगस खंकाः न्ह्याः वनादीगु दु ।
नेवाः म्ह्याय्मचा कल्पना महर्जन आः तिब्वतपाखें सगरमाथा गय्गु नितिं ब्यापक रुपं तयारी यानाच्वंगु दु । “मचा इहिपाः दिकेगु नितिं शिक्षा” अर्थात “बाल विवाह रोकथामका लागि शिक्षा” धइगु नारा बियाः थुगुसि वय्कः सगरमाथा गय्गु नितिं तयारी यानाच्वंगु खः । वइगु अप्रिल ११ तारिखय् उखेपाखे वनेगु, १६ तारिखय् बेस क्याम्पय् थ्यनीगु अनं लिपा मदिक्क सगरमाथापाखे थाहां वनेगु ग्वसाः ग्वयातःगु दु । सगरमाथाय् थ्यंकेत थ्यंमथ्यं न्यय्च्यान्हु माः धकाः धाःगु दु ।
थुगुसी सगरमाथा गय्गु नितिं यल महानगरपालिकाया नापनापं थीथी संघ संस्थानिसें ब्यक्तित्वपिन्सं नं थःत थीथी कथंया ग्वहालि यानाच्वंगु दु धकाः कल्पना महर्जनं धयादीगु दु । वय्कलं सगरमाथा च्वकाय् थ्यंकाः वाङमय शताब्दी पुरुषलिसें वरिष्ठ संस्कृतिविद् डा. सत्यमोहन जोशीया किपाः वयल महानगरपालिकाया ध्वाँय् नं ब्वय्केगु तयारी याःगु दु ।
थुगुसी यल महानगरपालिका सच्छि दँ क्यनीगु नापं वाडमय शताब्दी पुरुषलिसें वरिष्ठ संस्कृतिविद् डा. सत्यमोहन जोशी नं सच्छिदँ क्यनीगु इलय् हे लाक्क अथे हलिंया दकलय् तःजाःगु च्वापुगुँ सगरमाथाय् इमिगु ध्वाँय् ब्वय्केगु थःगु म्हगस खः धकाः तकं वय्कलं धयादीगु दु ।
तिब्वतपाखें दँय् स्वसःम्हेसित जक सगरमाथा गय्गु अनुमति बीगु यानाच्वंगु अवस्थाय् थुगुसी कल्पना महर्जनं नं उखेपाखें हे सगरमाथा गय्गु तयारी यानादीगु खः ।
कल्पना महर्जनं तिब्वतपाखें सगरमाथाय् वनेगु गुकथंया योजना दय्कादीगु खः, व ला छगू साहास ला खः हे खत अलय् वय्कलं सगरमाथा गयादीगु नापनापं वाङमय शताब्दी पुरुष डा. सत्यमोहन जोशी सच्छिदँ क्यनीगु लसताय् वय्कःया किपाः नापं यल महानगरपालिका सच्छिदँ क्यनीगु लसताय् यल महानगरपालिकाया ध्वाँय् ब्वय्कादीगु मेगु तःधंगु ज्या जूवनाच्वंगु दु ।
वय्कःया थुकथंया तःधंगु म्हगसयात पूवंकेगु नितिं सकलसिनं थःथःगु थासं ग्वाहालि याय्माःगु आवश्यकता दु ।
