५५ दँ लिपा इंग्ल्याण्ड युरोकप फुटबलया फाइनलय्
बछलागा चतुर्दशी ११४१,असार २४ बिहीवाः
![](https://www.lahananews.com/sites/default/files/3_11.jpg)
डेनमार्कलाई अतिरिक्त इलय् २–१या गोल अन्तरं बुका इंग्ल्याण्ड युरोकप फुटबलया फाइनलय् थ्यंगु दु ।
वंगु चान्हय् जूगु निगूगु सेमिफाइनल कासाय् डेनमार्कया मिकेल डाम्सगार्डया ३०गूगु मिनेटय् न्हापांगु गोल याःगु खः । डाम्सगार्ड क्रिश्चियन एरिक्सनया दुखद दुर्घटनालिपा टोलीया सुरुवाती ११म्हलय् लायेत ताःलाम्ह कासामि खः ।
३९ गूगु मिनेटय् डेनमार्कया कप्तान सिमोन कायरं आत्माघाति गोल यायेधुंका कासा १गू–१गू गोलया ज्वलिन्ज्वःलय् थ्यंगु खः । अतिरिक्त इलय् इंग्ल्याण्डं पेनाल्टी थ्वायेगु ह्वता चूलाकल । ह्यारी केनया सुरुवाती प्रहारयात डेनमार्कया गोलकिपर कास्पर स्माइकलं पनाबिउगु खः ।
तर रिबाउण्डय् केनं हे गोल यायेधुंका इंग्ल्याण्ड २गू–१गूया गोल अन्तरं त्यागु खः । कासा त्यागु लिसें इंग्ल्याण्ड ५५ दँ लिपा छुं नं मेजर फुटबल धेंधेंबल्लाया फाइनलय् थ्यनेत ताःलाःगु दु ।
सन् १९६६ या विश्वकप फुटबलया फाइनलय् तत्कालिन पश्चिम जर्मनीयात बुका उपाधि त्याकुगु इग्ल्याण्ड वयांलिपा विश्वकप व युरोकपया फाइनलय् थ्यंगु मदुनि ।
ग्यारेथ साउथगेटया प्रशिक्षणय् दूगु इंग्ल्याण्डं आः आइतबाः जुइगु फाइनलय् बल्लागु प्रतिद्वन्द्वी इटालीलिसे म्हितिइ । सेमिफाइनलय् स्पेनयात टाइ ब्रेकरय् बुका रोबर्टो म्यान्सीनीया इटाली फाइनलय् थ्यंगु खः ।
Categorized in कासा