३ नम्बर प्रदेशया नां ‘नेवाः–ताम्सालिङ प्रदेश’ जुइमाःगु माग
लहनान्युज | सिल्लाथ्व नवमि ११३८ (जनवरी २६ २०१८)
नेवाः जागरण मञ्चं थौं छगू प्रेस वक्तव्य पितबिसें ३ नम्बर प्रदेशया न्हापांगु प्रदेशसभाया बैठकं ३ नम्बर प्रदेशया नामांकन ‘नेवाः–ताम्सालिङ प्रदेश’ यायेगु नाप ३ नम्बर प्रदेशया नां ‘नेवाः–ताम्सालिङ प्रदेश’ व मुख्यमन्त्री नेवाः हे जुइमाःगु माग नितिं सकल प्रदेशसभाया दुजःपिन्त ध्यानाकर्षण याकूगु दु ।
मञ्चया नायः सुजीव बज्राचार्यं ल्हाःचिं तयाः पितब्यूगु उगु वक्तव्यय् प्रदेश व प्रतिनिधिसभाया चुनाव न्ह्यः मञ्चया संयोजनय् न्ह्याकूगु थीथी चुनावी अभियानय् प्रदेशसभाया उम्मेदवारपिं व प्रतिनिधिसभाया उम्मेदवारपिन्सं गुगु कथं ३ नम्बर प्रदेशया नां म्हसीका कथं तयेगु जुइ धकाः ब्यूगु बचं खः, उगु बचं लुमंकेत नं इनाप याःगु दु ।
वक्तव्यय् धयातःगु दु, “आःतक वःगु राजनीतिक हिउपाः लिपा नेवाः व तामाङलिसें आदिवासी जनजातिपिनिगु अधिकारयात सुनिश्चितता यायेगु लिसें इमिगु भावनायात नं कःघानाः देय्या राजनीतिइ स्थिरता हयेगु नितिं राजनीतिक पार्टीतसें थ्व इलय् निर्णायक युगान्तकारी निर्णय यायेमाः, थुकिया नितिं प्रदेशया नामांकन जातीय म्हसीका कथं तयेमाः, अथेहे जातीय वाहुल्यता व भूमिपुत्र जनताया म्हसीकाया कथं उगु हे जातिया मुख्यमन्त्री दयेकेमाः ।”
अथेहे, वक्तव्यय् नेपाःया इतिहासय् दकले न्हापां प्रदेशसभाया चुनाव जुइधुंकाः व प्रदेशसभापाखें शासन सत्ता न्ह्याकेगु संवैधानिक अधिकार छ्यलेगु थ्व ऐतिहासिक राजनीतिक पलाखय् नं नेवाः व तामाङपिन्त ल्यूने तयेगु एकल म्हसीका कथं राज्य संचालन यायेत स्वल धाःसा थुकियात नेवाःतसे स्वीकार याये मफइगु खँ नं न्ह्यथनातःगु दु ।
