३२क्वःगु संस्करण ओलम्पिक क्वचाल
गुँलाथ्व पारु ११४१, साउन २५ गते सोमबाः
![](https://www.lahananews.com/sites/default/files/oly_2.jpg)
३दँ लिपा फ्रान्सया पेरिसय् नापलायेगु वचं लिसें गृष्मकालिन ओलम्पिकया ३२क्वःगु संस्करण म्हिगःनिसें क्वचागु दु ।
जापानया टोकियोस्थित राष्ट्रिय रंगशालाय् म्हिगः छगू आकर्षक समारोह दथुइ अोलम्पिकया समापन याःगु खः । समारोहलय् ओलिम्पिकया ध्वाँय् फ्रान्सया पेरिसया मेयरयात लःल्हागु दु ।
थन ३दँ लिपा ओलिम्पिकया ३३क्वःगु संस्करण ग्वसाःग्वइगु जूगु दु । समापन समारोहयात संवोधन यासे्ं अन्तर्राष्ट्रिय ओलिम्पिक कमिटीया नायः थोमस बाचं जापानी नागरिकप्रति शुभाय् बिउसें महामारीया हे दथुइ १६न्हूया ज्याझ्व थ्वखुसिइ अभूतपूर्व जूगु धयादील ।
वयेकलं इतिहासया हे दक्वःलय् थाकुगु इलय् ओलिम्पिक खेलकुदं हलिंयात छथासय् हःगु टिप्पणी यानादील । ग्वसाःखलःया कथं कोरोनाभाइरसया संक्रमणया हुनिं १९म्ह कासामि प्रतिस्पर्धाय् दुथ्याये मखन ।
टोकियो ओलम्पिकया तक्मा धलःखय् अमेरिका च्याम्पियन जूगु दु । ३९ गू लुँ लिसें मुक्कं सच्छि व १३गू तक्मा त्याकुगु अमेरिका शीर्ष थासय् लायेत ताःलात । निगुगु थासय् चीनं ३८ गू लुँ, ३२गू वहः व १८गू कँय्या तक्मा लिसें मुक्कं ८८गू तक्मा चूलाकल ।
जापानं २७गू लुँ त्याकुबलय् बेलायतं २२गु लुँया तक्मा त्याकुगु दु । थ्व खुसिइ ६५गू देशं लुँया तक्मा त्याकुबलय् ९३गू देशं छुं नं छ्ुं तक्मा त्याकेत ताःलाःगु दु ।
Categorized in कासा