१३ गते किजापुजाया बिदा बीगु बचं
लहनान्युज | कौलागा सप्तमी ११३९ (अक्टुवर २० २०१९)
![](https://www.lahananews.com/sites/default/files/ktm.jpg)
प्रधानमन्त्री केपी शर्मा ओलीं थ्वहे वइगु कार्तिक १३ गते किजापुजाया लागिं सार्वजनिक बिदा बीगु खँ कनादीगु दु ।
थौं सुथय् नेकपाया येँ जिल्लाया जनप्रतिनिधिपिं प्रतिनिधि मण्डललिसे खँ ल्हासें वय्कलं कार्तिक १३ गते नं किजापुजा यायेगु लागिं मन्त्रिपरिषद्पाखें निर्णय यासें सार्वजनिक बिदा बीगु खँ कनादीगु खः ।
येँया संघीय सांसद कृष्णगोपाल श्रेष्ठया नेतृत्वय् वंगु प्रतिनिधि मण्डलं प्रम ओलीयात थुगुसी तिथि विवादया कारणं कार्तिक १३ गते किजापुजा न्यायेकेमाःपिं नेवाःतय्त व्यावहारिक समस्या वःगु जुयाः १३ गते कुन्हु नं सार्वजनिक बिदा बीमाःगु बारे कनादीगु खः ।
प्रम ओलीं सुयां नं संस्कृतियात प्रतिकुल लिच्वः लाकेगु सरकारया नीति मखु, सकसितं थःथःगु संस्कृति व संस्कार हनेगु समान अधिकार दु धासें कार्तिक १३ गते नं बिदाया लागिं विधिवत् निर्णय याकेगु बचं बियादीगु खः ।
थौं वःगु प्रतिनिधि मण्डलय् सांसद श्रेष्ठ लिसें प्रदेश सभाया सांसदपिं डा. अजयक्रान्ति शाक्य, राजेश शाक्य व येँ वडा २२ या अध्यक्ष चिनिकाजी महर्जन नं दुथ्याःगु खः ।