यल महानगरपालिका १६ वडा कलाकार समितिं ने.सं. ११४५ न्हूदँया लसताय् ग्वसाः ग्वःगु हुलाप्याखं कासाय् २३ म्हसिनं ब्वति कयादीगु दु । ब्वति कयादीपिं कासामिपिन्सं कार्तिक १० गते शनिवाःया दिनय् रत्नाकर महाविहार, हःबहा, रत्नाकर सामुदायिक भवनय् जुइगु अडिशनय् ताःलाकेमाःगु ग्वसाः खलः समितिया संयोजक सुरजवीर बज्राचार्य कनादीगु दु । थुगु कासाया बिजं कासा वइगु कार्तिक १६ गते शुक्रवाः यल लाय्कूया कात्तिदबुलिइ सनिलया ४ बजे न्ह्याइ ।

थुगु कासाय् न्हाप, ल्यू, लियांल्यू व हःपा सिरपाः त्याकादीपिन्त शिल्ड, दसिपौलिसें छसीकथं ५० हजार, ३० हजार, १५ हजार व ५ हजार नगद सिरपा देछायेगु व थुगु हे ज्याझ्वलय् वरिष्ठ कलाकार लोकगायक रत्न बेहोशी बज्राचार्ययात “ललितरत्न” उपाधिं छायेप्यूसें हनेगु ज्याझ्वः दुगु नं अध्यक्ष भाजु निर्मलरत्न शाक्यं कनादिल । न्हापांगु खुसी थुगु उपाधि देछाःसें वरिष्ठ संगीतकार मोहनप्रसाद जोशीयात देछाःगु खः ।

थुगु कासाय् ब्वति कयादीपिं आयुशा तामाङ, आयोना लाखा, इभान धाख्वा, उत्पला बज्राचार्य, विमिशा डंगोल, विमला महर्जन मानन्धर, जस्मि श्रेष्ठ, नैरात्मा बज्राचार्य, प्रज्ञा महर्जन, निमा महर्जन, मेरिस्का बज्राचार्य, रेजिना बज्राचार्य व लसता बज्राचार्य, सजगता मानन्धर, सफू बज्राचार्य, स्मृति शाक्य, स्लेजा शाक्य, सुनिभा शाक्य, सुनैना बज्राचार्य, सुयंका बज्राचार्य, शायरा महर्जन, लकि महर्जन, लुजला शाक्य खः । कासाय् येँ, यल, ख्वप व धादिङया कासामिपिं दुथ्याः ।

स्थानीय तहपाखें वडा अध्यक्ष निर्मलरत्न शाक्य कलाकार समिति स्वनेगु अवधारणा न्ह्यब्वयाः पत्रकार व कलाकार बज्राचार्यया कजिंसुइ ११ म्ह दुथ्याःगु समिति दयेकूगु खः । वंगु न्यादँनिसें येँया पुन्ही, न्हूदँ, श्रीपञ्चमी, फागु थें जाःगु थीथी नखःया लसताय् सांस्कृतिक ज्याझ्वः यायेगुलिसें कलाकार मुना, संकिपा कार्यशाला यानाः कला ख्यलय् उत्साह थनाच्वंगु थुगु समितिं निक्वःगु खुसी हुलाप्याखं कासाया ग्वसाः ग्वःगु खः  ।



 

 

Categorized in मनोरन्जन