हलिंया तःमिया धलखय् बनार्ड दुथ्यात
कछलाथ्व चतुर्दशी ११४१,जेष्ठ ११ मंगलवाः
हलिंया हे दक्कले तःमिया धलखय् बनार्ड आर्नल्ट दुथ्याःगु दु ।
फोब्र्स म्यागजिनं सार्वजानिक याःगु धलखय् सन् २०२१ या हलिंया तःमि मनुखय् फ्रान्सया नागरिक फेसन ब्रान्ड लुइस भ्यूटनया थुवाः आर्नल्टं अमेजन मालिक जेफ बेजोसयात ल्यूने लाकाः दक्कले तःमि मनू जूगु खः ।
फोब्र्सया कथं आर्नल्टया मुक्कं सम्पत्ति सच्छि व ८६ दशमलव ३ बिलियन डलर दु । वय्कःया सम्पत्ति निम्हम्ह तःमि मनुखय् अमेजन मालिक जेफ बेजोसया स्वयां ३सः मिलियन डलरं अप्वः खः ।
बेजोसयाके सच्छि व ८६ बिलियन डलर सम्पत्ति दु । टेस्ला व स्पेस–एक्स कम्पनी थुवाः इलोन मस्क सच्छि व ४७ दशमलव ३ बिलियन डलरलिसें स्वंगूगु थासय् दु । वंगु मार्च २०२० य् आर्नल्टया सम्पत्ति ७६ बिलियन डलर सम्पत्ति दुगुलिइ व थहांवनाः म्हिगः तक्कय् सच्छि व ८६ दशमलव ३ बिलियन डलर थ्यंगु खः ।
वंगु १४ लाय् हे सच्छि व १० बिलियन डलरं वय्कःया सम्पत्ति अप्वःगु खः । कोरोना भाइरस महामारीइ नं वय्कःया कम्पनी लुइस भ्यूटनं यक्व हे आम्दानी याःगु दु ।
Categorized in अन्तर्राष्ट्रिय
