स्वम्ह पत्रकार सम्मानित
नृपेन्द्रलाल श्रेष्ठ | आमै ११४०,कार्तिक ३० आइतवाः
![](https://www.lahananews.com/sites/default/files/yala%20%282%29.jpg)
बन्द जुयाच्वंगु पायः (खड्ग) जात्रा व नव दुर्गा ( गःथुँ प्यांख ) नाच सञ्चालनया लागि उल्लेखनीय भूमिका म्हितूपि स्वम्ह पत्रकारपिन्त सम्मान याःगु दु। यल सांस्कृतिक पर्व संरक्षण समितिं थौं आईतवाः छगु ज्याझ्वःयासे स्वम्ह पत्रकारपि सुनील महर्जन, प्रशान्त माली व राजेश बज्राचार्य सम्मान याःगु खः।
महर्जन नेवाःपत्रकार राष्ट्रिय दबूया केन्द्रीय महासचिव, माली पत्रकार राष्ट्रिय दबू ललितपुर शाखाया उपाध्यक्ष व बज्राचार्य शाखाया पूर्व सचिवपि खः। उगु ज्याझ्वलय् पाटन दरबार क्षेत्र पाटन संग्रहालयय् उगु ज्याझ्वः जुगु खः। ज्याझ्वलय् ललितपुर उद्योग वाणिज्य संघया अध्यक्ष नाप समितिया संयोजक कृष्णलाल महर्जनं न्यका वाग्मती प्रदेशया सासंद् शोभा शाक्य व यल महानगरपालिकाया मेयर चिरिबाबु महर्जनं पत्रकारपिन्त सम्मान पत्र लल्हाःगु खः।
मोहनिया इलय् यल लाय्कूलिं जुइगु पायः जात्रा व गथु प्याँख हाकन सञ्चालनया लागि सञ्चार ख्यलं उल्लेखनीय भूमिका निर्वाह यागुलि अथे सम्मान यानागु धका समितिया संयोजक कृष्णलाल महर्जन धाःगु खः। लिच्छिविकालीन संस्कृति, धार्मिक व ऐतिहासिक महत्वया पायः जात्रा २३ दँनिसे रोके जुया वयाच्वंगु खः। अथेहे ठेचाया नवदुर्गा प्याखं मोहनिया चालं कुन्हु पट्काय् वःगु ४० दँनिसे व यल लाय्कूलि न्यादँ निसे रोके जुयावयाच्वंगु खः।
उगु प्याखं पुनः सञ्चालन यायेत नाप समस्या समाधान, सरोकारवाला व गुठीयार दथुइ समन्वय, स्थानीय निकायय् निरन्तर पैरवीया लागि तत्कालीन वाणिज्य संघया अध्यक्ष सविन श्रेष्ठ संयोजनय् यल सांस्कृतिक पर्व संरक्षण समिति गठन याःगु खः। समितिं २०७३ चैत्रय् जिल्ला विकास समितिया ग्वाहालि बृहत सरोकार भेला ग्वसाः ग्वःया उगु प्याखं संञ्चालनया लागि सरोकारवाला नाप संवाद याना भेला, डेलिगेशन व ज्ञापनपत्र बुझे यायेगु नीष्कर्ष पिकाःगु खः।
उगु ज्याझ्वलय् गुथियार, सञ्चार क्षेत्र, नेवाःपत्रकार राष्ट्रिय दबू, उद्मी व्यवसायी व महानगरपालिका लगायत सकसिगु कुतलं २०७४ य् यलया लाय्कूलि नवदुर्गा प्याखं हाकन संञ्चालन यायेगु धका संघया महासचिव मनोजबहादुर न्याछ्यो न धयादिगु खः। उगु ज्याझ्वलय् पत्रकार प्रशान्त मालीं च्वयादिगु खड्ग पायः जात्रा सफूया न पितब्बज्या जुगु खः। उगु सफूतिइ उगु प्याखंया धार्मिक, सांस्कृतिक, ऐतिहासिक पक्ष व प्याखं संञ्चालनया लागि माःगु योजनाबद्ध भूमिका व कुतःया दस्तावेज दुगु धका च्वमि माली धाःगु खः।
ज्याझ्वलय् यल क्षेत्र नं २ या सांसद् कृष्णलाल महर्जनं संस्कृति पर्व संरक्षणया लागि दक्को छप्प जुया न्ह्यावने माःगु खँय् बःबियादिगु खः। उगु ज्याझ्वलय् थीथी गुठीया गुठीयार, बाजंखलः जातीय समाजया प्रतिनिधि व उद्मी व्यवसायी अजरमान जोशी लगायतपिन्त न सम्मान याःगु खः। महानगरपालिकाया मेयर महर्जन, संघया वरिष्ठ उपाध्यक्ष भरतलाल जोशीं संस्कृति संरक्षणया लागि सकसिया कुतलं थुगु ज्या ताःलागु धका धयादिगु खः।
किपाः किर्तन जोशी
Categorized in राष्ट्रिय