स्वनिगःया २४३गु युनिटय् मानवअधिकार सम्बन्धी प्रशिक्षण बिइगु
लहानान्युज | अनलाथ्व सप्तमी ११४०,असोज ७ बुधवाः
![](https://www.lahananews.com/sites/default/files/New_Metro_Pic_Edited.jpg)
प्रहरी दाया घाःपा जुगु व यातनाया घटनाहरु सार्वजनिक जुया च्वंगु इलय् महानगरीय प्रहरी कार्यालय रानीपोखरी नं स्वनिगःया २४३ गु युनिटय् मानवअधिकार सम्बन्धी प्रशिक्षण बिइ त्यःगु दु ।
प्रशिक्षण बिइगु लागि एसएसपी सुशील कुमार यादव व किरण बज्राचार्यया नेतृत्वय् टोली खटे याःगु दु ।
जनताया हक अधिकारयात सम्मान यासे व्यवसायिक जिम्मेवारी गये याना पूरा यायेगु धका जवाननिसे अधिकृत तक प्रशिक्षण बिइगु महानगरीय प्रहरी कार्यालय रानीपोखरीया डीआईजी विश्वराज पोखरेलं धाःगु दु ।
कोरोना संक्रमणया जोखिम बाबजुद न ड्युटी पूरा याये माःगुलि कर्मचारी व्यक्तिगत, पारिवारिक व मनोगत समस्या खने दुगुलि प्रशिक्षण बिइ त्यनागु धका धाःगु दु ।
कोरोना संक्रमणया जोखिमयात बेवास्ता यासे सतक प्रदर्शन याना वयाच्वंगुलि प्रहरीं निर्मम ढंगं दाययेगु याना हःगुलि नेपाल प्रहरीया आलोचना जुया वयाच्वंगु दु ।
थौंकन्ह्य कुलमान घिसिङयात नेपाल विद्युत प्राधिकरणय् निरन्तरता बिइ माःगु माग यासे प्रदर्शनय् कुहा वया च्वंगु इलय् प्रहरीं बबरमहलय् घाःपा जुइक दागु खः ।
अथेहे संविधान दिवसया सन्दर्भय् मिडियायात प्रतिक्रिया बिया च्वम्ह छम्ह मनूयात नयाँबानेश्वरय् प्रहरी दाःगु खः ।
Categorized in राष्ट्रिय