स्पेनिस लिग फुटबलय् रियाल मड्रिडं एथ्लेटिको मड्रिडयात बुकल
थिंला नवमी ११४२, मंसीर २७ सोमबाः
![](https://www.lahananews.com/sites/default/files/real_13.jpg)
स्पेनिस लिग फुटबलय् रियाल मड्रिडं एथ्लेटिको मड्रिडयात २गू–०या गोल अन्तरं बुकुगु दु ।
रियाल मड्रिडया मैदानय् वंगु चान्हय् जूगु मड्रिड डर्बीइ घरेलु टोलीयात त्याका बिइत करिम बेन्जमा व मार्को एसेन्सीयों छगू छगू गोल याःगु खः ।
कासा त्यागु लिसें रियाल मड्रिडं धलःया शीर्ष थासय् ८ गू ल्याःखं अग्रता काःगु दु । लिगय् १७गू कासां रियाल मड्रिडया ४२गू ल्याः जूगु दु । छगू कासा म्हो म्हितूगु सेभिया ३४ गू ल्याः लिसें निगूगु थासय् दूबलय् ३गूगु थाय्या रियाल बेटिसया ३३गू ल्याः जूगु दु ।
वंगु चान्हय् जूगु मेगु कासाय् बार्सिलोना धाःसा ओसासुनालिसे २गू–२गू गोलया ज्वलिन्ज्वःलय् दिउगु दु । कासाय् बार्साया नितिं गोन्जालेज इग्लेसियास व इजाल्जुलीं निगू गोल याःगु खः ।
तर ओसासुनाया डेभिड गार्सिया व इजेक्वेल एभिलां छगू छगू याना कासा ज्वलिन्ज्वःलय् दिउगु खः ।
ला लिगाया हे मेगु कासाय् रियाल बेटिसं रियाल सोसिडाडयात ४गू–०या गोल अन्तरं बुकुबलय् भियारियालं रायो भायकानोयात २गू–०या गोल अन्तरं बुकुगु खः ।
Categorized in कासा