सेटिङय् धमाधम जग्गा पास
लहानान्युज | अनलाथ्व सप्तमी ११४०,असोज ७ बुधवाः
स्वनिगःया स्वंगुलिं जिल्लाया मालपोत ज्याकूया कर्मचारी, लेखापढी व्यवसायीव जग्गा व्यवसायी दथुइया सेटिङय् धमाधम जग्गापास, नामसारी व हाल साविक याय्गु यानाच्वंगु खनेदुगु दु । सरकारं कोभिड–१९ संक्रमणया जोखिम अप्वःगु धासें स्वनिगःया भीडभाड जुइगु भूमिसुधार तथा मालपोत ज्याकूपाखें अत्याआवश्यक बाहेक मेगु सेवाबन्द याय्त याःगु निर्णय अःखः मालपोतय् मिलेमतोय् ज्या याय्गु यानाच्वंगु खः।
यल महानगरपालिकाया राम महर्जन शुक्रबाःबैना पच जुइगु ग्याःचिकुं इमाडोलस्थित १ रोपनी ७ आना जग्गापास याय्त धकाः मालपोत ज्याकू लगनखेलय् थ्यंगु जुयाच्वन । वय्कःयात कर्मचारीं ज्याकूया सेवाप्रवाह स्थगित जूगु धासें लित छ्वया हल । यलया हे सुदर्शन शाक्ययात छगू बैंकपाखें धितो फुकुवायानाः मेगु बैंकपाखें रोक्का तय्माःगु खः । वय्कःयात नं कर्मचारीं अत्याआवश्यक सेवा अन्र्तगतया ज्या मखूगु धयाः लित छ्वया हल । तर, व हे दिनय् गोदावरी नगरपालिका–५ लेलेया अर्जुन सापकोटाया धाःसा जग्गापास जुल ।
यल मालपोत अधिकृत हरिकृष्ण सुवेदीव सक्वया प्रमुख मालपोत अधिकृत रधुनाथ फुँयालं बैंकय् राजस्व दाखिला जुइधु ंकूपिनिगु हकय् जक जग्गापास यानागु दाबी यानादिल । सुवेदीं ज्याकू प्रमुखयात अत्यआवश्यकताःसा न्ह्यागु नं ज्या (जग्गापास) याय्फइगु दाबी यानादिल । कंलकीया प्रमुख मालपोत अधिकृत टेकराज अर्यालं सेवा बन्द जुइ न्ह्यः निर्णय जूगु तर दाखिला खारेज जुइ ल्यं दुपिनिगु जक ज्या यानागु दाबी यानादिल।
भूमि व्यवस्थापन तथा अभिखेल विभागया कथं मालपोत ज्याकूया सेवा बन्द जूगु कन्हय् कुन्हु २८ गते यलय् प्यंगू, २९ व ३० गते निगू÷निगू लिखितपास (जग्गापास) जूगु दुसा छगू÷छगू जग्गा नामसारी व संशोधनजूगु दु । जग्गा पास धाःसा यल महानगरपालिका, डुकुछाप, लुभु, टिकाथली, बुङमती, इमाडोलय् छगू÷छगू व सैबुयानिगू दु । जग्गा नामसारी व संशोधन धाःसा लामाटार व डुकुछापया दु ।
रोक्का धाःसा गोदामचौर, इमाडोल, छम्पी, ठेचो, भारदेव, ठैव, नल्लु, लेले, सैबु, लुभु, सानोगाउँ, टिकाथलीया यानाः३३ दु । अथे हे फुकुवा९ दु ।
येँय् धाःसा सक्व मालपोत ज्याकुथिइ छगू लिखतपास, मालपोत ज्याकू कंलकीं निगू हाल साविक व ९ रोक्का, भूमिसुधार तथामालपोत ज्याकू डिल्लीबजारय् ६ रोक्का, चावहिलिइ छगू हाल साविक, मनमय्जुइ छगू रोक्काजूगु दु । ख्वप मालपोेत ज्याकूपाखे ंधाःसा प्यंगू लिखत पास जूगु दु । ख्वपया मालपोत अधिकृत जयन्त भट्टराईं थ्व बारे थःत जानकारी मदुगु दाबीयात । भूमि व्यवस्थापन तथा अभिलेख विभाग प्रवक्ता गुरुदत्त सुवेदीं थ्व बारे याकनं हे अनुसन्धान क्वचाय्केगु धयादी । सम्बन्धित मालपोत अधिकृत तय्त न्यनेकने न्ह्याय्धुंकूगु वय्कःयाधापू खः ।
मालपोत ज्याकू यलया न्याम्ह कर्मचारी निलम्बनय् लाःगु सुवेदीं जानकारी बियादिल । अख्तियार दुरुपयोग अनुसन्धान आयोगं विषेश अदालतय् मुद्दा दायर यानाः निलम्बनय् लाःपिंलय् मालपोत अधिकृत बद्रीराज ढकाल, नासु मनोज घिमिरे, विष्णु भण्डारी दु साक्वाःक्वाः घुस कयाच्वँच्वं हे ज्वनाःनिलम्बनय् लाःपिंलय् नासु कुमारराज भण्डारीव दयाराम खत्री दु ।
भ्रष्टाचार निवारण ऐन, २०५९ या परिच्छेद–२ स भ्रष्टाचारया कसुर व सजाय सम्बन्धी व्यवस्था दु । दफा ३ य् रिसव तकाःम्ह ब्यूम्हेसित २५द्वः तका तक्क जरीवाना व स्वला तक्क कैद, २५द्वः स्वयां आपाः ५० द्वः तका तक्क स्वलानिसें प्यला तक्क, ५०द्वः स्वयां आपाः छगू लाख तक्क प्यलानिसें खुलातक्क, छगू लाख स्वयां आपाः न्यागू लाख तक्क खुलानिसें दत्या तक्क, न्यागू लाख स्वयां आपाः १० लाख तक्क दत्यानिसें निदँत्यातक्क कैद जुइगु व्यवस्था दु ।
अथे हे गैरकानुनी लाभ काइपिं बीपिं वा सरकार वा सार्वजनिक संस्थायात गैरकानुनी हानि याय्ग ु बदनियतं छुं ज्या याःसा कसुरया मात्रा कथं स्वलानिसें स्वदँतक्क कैद व बिगो सीदुगुलिइ बिगो कथं जरिबाना यानाः बिगो असूल उपर याइ । बिगो सीमदुसा स्वलानिसें स्वदँतक्क व झिद्वःनिसें ५०द्वः तक्क जरिबाना याकेगु व्यवस्था दु । निजामती सेवा ऐन २०४९ या दफा ६० इ अनुशासनहीन ज्या याःसा, ऐन अन्तर्गत दय्कूगु नियमय् उल्लेखित आचरण सम्बन्धी खँत उल्लंघन याःसा, व्यवस्थापन परीक्षणं खनेदुगु अनियमितता सम्बन्धय् ब्यूगु निर्देशन पालना मयाःसा, मेथाय् गुगु नं कथंया नोकरी याय्गु वा आर्थिक लाभ वा छुं सुविधाकाय्गु कथं परामर्शदाता, सल्लाकार विशेषज्ञ वा छुं हैसियतं सेवा ब्यूसा निदँनिसें न्यादँ तक्क बढुवा रोक्का वा निदँनिसें न्यादँ तक्क तलब वृद्धि रोक्का याय् फइगु व्यवस्था दु ।
