सीपीएलया अनुमति बिल
लहनान्युज | दिल्लागा षष्ठी ११४०,असार २७ शनिवाः
![](https://www.lahananews.com/sites/default/files/sadeep_0.jpg)
नेपाःया कासामि सन्दीप लामिछानें क्यारेबियन प्रिमियर लिग (सीपीएल) य् म्हितिगु लागि ट्रिनिडाड एण्ड टोबागों अनुमति बिःगु दु ।
थ्व स्वया न्ह्यः ट्रिनिडाड एण्ड टोबागोया सरकारं अनुमिति मबिगुया काराणं सीपीएल जुइगु व मजुइगुलि अन्योल जूगु खः । आः कासाया लागि अनुमति बिइवः सीपीएल जूइगु पक्का जुगु दु । थुगु कासा वइगु अगस्त १८ निसे सेप्टेम्बर १० तारिख तक सञ्चालन जुइ तर कासाय् धाःसा दर्शक मदयेक रंगशालाय् जुइ ।
सीपीएलया न्हापागु व निगूगु संस्करण थीथी मैदानय् कासा जूगु खःसा स्वक्वःगू संस्करण धाःसा ट्रनिडाड एण्ड टोबागोया निगू मैदानय् म्हितिगू सरकारं अनुमति बिःगु दु ।
कासामि व प्रशिक्षकय् कोरोना संक्रमण खने दुगु अवस्थाय् दक्कोसित १४ दिं सेल्फ आइसोलेसनय् तइगु जुगु दु । ग्वसाः सीपीएल खलः व सरकार दथुइ चान्ह्य कासा यायेगु मापदण्डबारे सहमति जूगु खः ।
उगु कासाय् १९दँयाम्ह सन्दीपं छगू लाख ३० द्धः अमेरिकी डलरं अनुबन्धित जूगु खः । वयात जमैका तलावाजं अनुबन्ध याःगु खः । थुगु कासाया लागि २३ देय् या ५३७ म्ह कासामिपिन्स नां दर्ता याःगु खः । सन्दीपं सीपीएलया लागि थःत अनुबन्धित मूल्य ९० हजार अमेरिकी डलर तोके याःगु खः ।
सन्दीप सीपीएलया लागि स्वक्वःगु पटक अनुबन्धित जूगु खः । थ्व स्वया न्ह्यः सीपीएलया न्हापागु संस्करण सन् २०१८ य् सेन्ट किट्स एन्ड नाभिस प्याट्रियट्सया लागि न्याद्धः व निगू संस्करण सन् २०१९ य् बार्बाडोस ट्राइडेन्सया लागि ७० द्धः अमेरिकी डलरं अनुबन्धित जूगु खः ।