सहासीयक सरिता महर्जनया नितिं ग्वहालि अभियान
श्रीकृष्ण महर्जन
नीप्यदँ दुम्ह येँया लगंया ग्वफलय् च्वंम्ह सरिता महर्जनयात मेट्रो एफएमय् नेपालमण्डल दबुलिइ आः तकया दुने कयागु अन्तर्वाता मध्ये छगू लमुंकेबहःगु अन्तर्वार्ता जूगु दु । थनि छगू दशक न्ह्यःनिसें कया च्वनागु अन्तर्वार्ता मध्ये छगू विस्कं पहया अन्तर्वार्ता जूगु दु । वय्कःया अन्तर्वार्ता न्यनेध्ुंकाः नेवाः सरोकार ज्याझ्वलय् फ्वन याना सहभागी जुयादीपिं यक्वसिया ख्वखना सः वल । गुलिं गुलिं ला ख्वये मास्ती वया न्वंवाये तकं मफत ।
अले यक्वसिनं ला सरिता महर्जनयात आर्थिक ग्वहालि यायेत तयार दु धकाः घोषणा तकं यानादिल । बास्तवय् सरिता महर्जनं थःत आर्थिक ग्वहालि यायेमाल धकाः सुयात नं इनाप यानादीगु नं मखु । अय्नं एफएमय् फोन याना ज्याझ्वलय् ब्वतिकासें ख्वखना सलं दर्जनौं मनूतय्सं ग्वहालि यायेगु बचं बियादिल ।
येँया श्रीकृष्ण महर्जन, किपूया नन्दलाल महर्जन, डल्लुया विद्या चित्रकार, येँया नासिर खान, यलया बुद्ध शाक्य, यलया किरण खड्गी, यलया नानी शोभा, येँया दिपक तुलाधर, सामाखुसिया विश्वनाथ श्रेष्ठ, किपूया नजरराम महर्जन, यलया शान्तराज शाक्य, नगदेशया लक्ष्मी कृष्ण कोजु, तिमिला कोजु, अथे हे जयप्रकाश शाक्य, न्हुच्छेलक्ष्मी घुसः,धु्रब प्रधान, त्रिरत्न महर्जन, मदनमान राजभण्डरी, तेजमान शाक्य लयायतपिन्सं ब्वति कया सरिता महर्जनयात आर्थिक समस्या जूगुलिं थःपिन्सं नं फुगु कथं ग्वहालि यायेगु बचंबिसें महर्जनया बैंक नम्बर बिल धाःसा बांलाइ धकाः धयादीगु खः ।
स्वत स्फूर्त रुपं जनस्तरपाखें आर्थिक ग्वहालि यायेगु बचं वःगुया मू कारण धइगु सरिता महर्जन छम्ह साहायी मिसा जुया बिउगुलिं खः । थःत जन्म बिउम्ह अबु हिराकाजी महर्जनया नितिं थःगु शरिरया ३५ प्रतिशत स्येँ अर्थात कलेजो दाना बियादीम्ह खः । थः अबुयात स्ये दान बिया अबुयात न्हूगु जन्म बियादीम्ह वय्कः आः स्वला तक आराम कया च्वनेमालीगु, छुं नं कथंया ज्या याये मखनीगु नापं आर्थिक श्रोत छुं नं मदुगुलिं खः ।
उलि जक मखु सरिता महर्जनया छम्ह केँय्यात हुर्केयायेमाःगु अवस्था दुसा मेखे थः मां मन्जु महर्जनया नं निगलं जलासेँ स्याना वालय् निक्वः डाइलासिस यायेमालाच्वंगु दु । छखा हे छेँया अबुयात थःगु स्येँ दाना बियादीम्ह अले वाःपतिकं निक्वः डाइलेसिस यायेगु नितिं व्यवस्था यायेमाःम्ह सरिता महर्जन स्वयं थ्व इलय् लासाय् लानाच्वंगु दु ।
उपचारया झ्वलय् दुगु बुँ छकू नं मिइ धुंकूगु व आः छुं हे आर्थिक श्रोत मदया समस्या जुयाच्वंम्ह सरिता महर्जनया दुःख न्यना न्ह्याम्हेस्यां नुगःमछिनीगु स्वाभाविक हे खः । अले मदिक्क भ्क्तपुर अस्पतालय् वना वासः यायेमाःगु जूगुलिं सूर्यविनायक लागाय् म्हस्यूपिन्थाय् च्वना वयाच्वंगु सरिताया परिवारयात थ्व इलय् तःधंगु आर्थिक समस्या जुयाच्वंगु दु ।
नकतिनि नीप्यदँ दुगु अवस्थाय् थःगु स्येँ ध्यंकाः थः अबुयात तयादीम्ह, निगलं जलासेँ स्याना वासःयाये मालाच्वंम्ह अले थः सुचिकाःज्या सया नं ज्या यायेत ई मालाच्वंगु अवस्थाय् गुगु कथं वय्कःया जीवनय् समस्या वल व खँ न्यना यक्व हे मनूतय्सं नुगः मछिंकल । उकिं एफ एमय् ब्वति कयादीपिं अप्वःसिनं सरिता महर्जनया बैंकया खाता नम्बर माल धकाः धयादीगु खः ।
उग्रिमय् हे सरिता महर्जनया स्वापू तया वय्कःया बैंया नम्बर कायेगु ज्या याना अले कन्हय् खुन्हु हे वय्कःया बैंक नम्बर एफ एमपाखें सार्वजनिक याना । कयौं मनूतय्सं वय्कःया बैंक नम्बर कयादिल । कन्हय् खुन्हु नं आर्थिक रुपं ग्वहालि यायेगु खँ कनादिीपिं धर्म महर्जन, जुजुभाई शाकय, प्रेम बज्राचार्य, सुदय सिलाकार, रत्नमाया महर्जन, किरण खड्की चन्दन शाक्य लगायापिं खः । आशा दु वय्कःया उगु नम्बरय् फुपिन्सं फुगु कथं आर्थिक ग्वहालि यानादी धकाः ।
सरिता महर्जनयात थौं गुगु कथं समस्या वल व छम्ह मनूया नितिं जीवनय् वःगु तःधंगु प्रहार खः । मचाबले कथुइ थ्यनेृ धुंकूगु नं ल्ह्वया नकाःतःम्ह मां, मचा हुर्के यायेगु नितिं न्ह्याथे दुःख सिइमाःसां लिफः मस्वइम्ह थः अबुयात नितिं गुगु कथं सरिता महर्जन म्ह्याय् मचा जुया नं भूमिका म्हितादिल उकिं वय्कःया थुगु सहासयात तसकं च्वछायेमाः । सरिता महर्जनं थ्व इलय् ज्या याना नये मफु अले आर्थिक रुपं तसकं समस्या जुयाच्वंगु दु ।
थज्वःगु इलय् हे अवश्य नं ग्वहालि यायेमाः धकाः तायेका एफ एमपाखें हे अभियान न्ह्याकेगु, समाजिक संजाल फेसबुकपाखें आह्वान यायेगु नाप नापं थःम्ह फुगु थासं भूमिका म्हितेमाःगु अवस्था वःगु दु । उकिं सरिता महर्जनया नितिं सकलें जाना ग्वहालि याये । गबले तक वय्कः थःम्हं कमेयाना नये फइमखु अथे धइगु स्वला तकया नितिं वय्कःयात ग्वहालि आवश्यकता दु । दुःख जूम्हेसित ग्वहालि यायेगु हे द्कले तःधंगु धर्म खः धकाः थुइके ।
दुःख जूम्ह मनूयात ग्वहालि यायेगु थ्व अभियानयात सकलसिनं साथ बिइ धकाः आशा यानाच्वना । नापं वय्कः सरिता महर्जनयात ग्वहालि यायेगु इच्छा दुसा Ac name Sarita Maharjan Ac no 00406953230018 Himalayan Bank Ltd Bhaktapur branch
य् ध्यबा छ्वया ग्वहालि यानादीत इनाप ।
