सर्वोच्चया फैसला धुंकाः देय्न्यंक सुरक्षा सतर्कता थकाल
दिल्लाथ्व तृतीया ११४१,असार २९ मंगलवाः
लिपांगु राजनीतिक घटनाक्रमलिसें येँ लिसें देय्न्यंक सुरक्षा सतर्कता थकाःगु दु ।
सर्वोच्च अदालतया फैसला धुंकाः तरंगित जूगु राजनीतिक ज्याखँया हुनिं विरोध प्रदर्शन व थीथी ज्याखँ अप्वया वयेधुंकाः सुरक्षा तैनाथी थकयागु महानगरीय प्रहरी ज्याकुथिं न्ह्यथंगु दु ।
कोरोना महामारी न्ह्यानाच्वंसां सर्वोच्चया फैसला धुंकाः देय्या थीथी क्षेत्रय् जुलुस व प्रदर्शन जुयावःबलय् सुरक्षाकःमिया उपस्थिति थकाःगु खः । थुकिया लागिं स्वनिगः दुने तँसा सुरक्षाकःमि परिचालन यानाः हाइ अलर्टय् तःगु दु ।
प्रहरीं सुरक्षाया लागिं सादा वसःया सुरक्षाकःमि नं परिचालित यानागु न्ह्यथंगु दु । सुरक्षा थ्रेट जुइफुपिं व्यक्ति, छेँ व ज्याकुथिइ सुरक्षाकःमिया निगरानी थकाःगु दु ।
नापं, राजनीतिक दलया नेता, सर्वोच्च अदालतया न्यायाधीश, अधिवक्तालिसेंयात नं सुरक्षा निगरानी थकयागु प्रहरी प्रशासनं न्ह्यथंगु दु ।
Categorized in राष्ट्रिय
