सरकारयात न्हयन्हुया अल्टिमेटमलिसें मोर्चाया ज्ञापनपौ
लहनान्यूज | चिल्लाथ्व एकादशी ११३७ (मार्च ८ २०१७)
![](https://www.lahananews.com/sites/default/files/morcha_1.jpg)
संयुक्त लोकतान्त्रिक मधेसी मोर्चां प्रधानमन्त्री पुष्पकमल दाहालयात न्हयन्हुया अल्टिमेटमलिसें न्यागू बुँदे ज्ञापनपौ लःल्हाःगु दु ।
प्रधानमन्त्री निवास बालुवाटारय् मोर्चाय् आवद्ध न्हयगू दलया नेतापिन्सं प्रधानमन्त्री दाहालयात नापलानाः ज्ञापनपौ लःल्हाःगु खः । लिसें मोर्चां न्हयन्हु लिपा थःपिनिगु माग पूमवंसा थःपिन्सं सरकारयात बियागु समर्थन स्वतः मदइगु नं धाःगु दु ।
ज्ञापनपतिइ स्थानीय निर्वाचनया ज्याझ्वः लित कायेमाःगु, संविधान संशोधन यानाः थम्हं ल्ह्वना वयाच्वनागु मुद्दा सम्बोधन यायेमाःगु माग यानातःगु दु । लिसें स्थानीय तगिंया संरचनायात प्रदेशया क्षेत्राधिकार दुने लाकेमाःगु व सरकार गठन याःबलय् जूगु स्वंगू बुँदे सम्झौता कार्यान्वयन जुइमाःगु माग नं याःगु दु ।
सप्तरी घटनाय् मदुपिन्त सहिद घोषणा यानाः क्षतिपूर्ति बीमाःगु व घटनाया छानबिन यायेत उच्चस्तरीय आयोग गठन यायेमाःगु माग नं थःपिनिगु दुगु मोर्चां न्ह्यथंगु दु ।
प्रधानमन्त्रीं सत्ता गठनबन्धन व मेगु दलतलिसे सहलह यानाः सम्बोधनया नितिं पहल यायेु धयादीगु सीदुगु दु ।
Categorized in राजनीति