सम्पूर्ण विश्व हे युद्धय् दुगु किपू मेयरया धापू
नृपेन्द्रलाल श्रेष्ठ | चौलाथ्व चतुर्थी ११४०
![](https://www.lahananews.com/sites/default/files/ramesh_0.jpg)
किर्तिपुर नगरपालिकाया मेयर रमेश महर्जनं वर्तमान इलय् सम्पूर्ण विश्व हे युद्धय् दुगु धयादीगु दु । सम्पूर्ण विश्वया मानव जगत हे आः छगू भाइरसलिसे युद्धया अवस्थाय् दुगु धयादीगु खः ।
लहनान्यूजलिसे खँ ल्हासें मेयर महर्जनं धयादिल, ‘आः मुक्क. मानव जगत भाइरसलिसे ल्वानाच्वंगु दु, थुकियात छगू कथं स्वंगूगु विश्वयुद्ध हे धाःसां ज्यू ।’
नापं, मेयर महर्जनं लकडाउनयात पूर्ण रुपं पालना यायेत नं सकलसित इनाप यानादिल । लकडाउन धयागु छुं प्राप्तीया लागिं राजनीतिक दलं याइगु हडताल थुज्वःगु मखूगु धासें लकडाउन थःपिनिगु लागिं हे खः धकाः थुइकेत वयकलं इनाप यानादिल ।
कोरोना भाइरस धयागु मात्तुमालाः छेँय् छेँय् वइगु मखसें झी हे पिहांवनाः भाइरसया स्वापुतिइ वल धायेवं तिनि वं आक्रमण याइगु जूगुलिं आःया अवस्थाय् सकलसित छेँय् हे च्वनाः सुरक्षित जुयाच्वनेत वयकलं इनाप यानादिल ।
भाइरस मनूया सम्पर्कय् मवःतल्ले गनं छथाय् च्वनाः ताः ईतक्क म्वानामच्वनीगु कारणं झी भाइरसया सम्पर्कय् मलायेमा धकाः हे लकडाउन यायेमाःगु वयकःया धापू खः ।
लकडाउनयात पालना याकेत सचेतना कार्यक्रमया लिसें डिसइनफेक्सनया स्प्रे यायेगु ज्या नं जुयाच्वंगु वयकलं जानकारी बियादिल ।
लिसें क्वारेन्टाइन तयेगु थाय् लिसें आइसोलेसन वार्ड दयेकेत नं तयारी जुयाच्वंगु वयकलं धयादिल ।
Categorized in राष्ट्रिय