समय्बजीया ६५० ब्वः क्वचाल
लहनान्युज | कछलागा अष्टमी ११३८ (नोभेम्बर ११ २०१७)
![](https://www.lahananews.com/sites/default/files/23472969_839002186282716_4505380820493956395_n.jpg)
ईमेज च्यानल टेलिभिजनय् क्यना वया च्वंगु नेपालभाषाया ज्याझ्वः “समय्बजी”या ६५० ब्वः थ्यंगु लसताय् यलया जाह्वलाःख्यलय् च्वंगु लभ्ली ब्यांक्वेटय् छगू लसता ज्याझ्वः जूगु दु ।
नेपालभाषाया न्हापांम्ह सिने पत्रकारकथं कयातःम्ह नांजाम्ह सिने पत्रकार विजयरत्न असंबरेया विशेष उपस्थिती जुगु खः ।
![](http://www.lahananews.com/sites/default/files/pictures/23473182_839003039615964_3661024558714854452_n_0.jpg)
थःगु नुगः खँ तयेगु झ्वलय् बरिष्ठ पत्रकार असंबरें नेपालभाषाया ज्याझ्वः गुलितक्क लोकंह्वाः धइगु खँया दसु “समय्बजी”या ६५० ब्वः थ्यंगुलि कायेफइ धका धासे आः नं रहर व भावनांजक न्ह्याना च्वनेगु मखसे आर्थिक रुपं नं तिबः जुइकथं सांगितिक व संकिपा ख्यलय् ज्याः न्ह्याकेमाःगु खँय् बःबियादिगु खः ।
“समय्बजी”या च्वमि व निर्देशक सुरेन्द्र मानन्धरलिसेलिसें रेवन्तलाल श्रेष्ठ , रजनी खड्गी पिन्सं न्ह्याइपुसे च्वंगु लकसय् न्ह्याकूगु “समय्बजी”या ६५० ब्वः थ्यंगु लसता ज्याझ्वलय् कलाकार गोबिन्द ह्युमत , मोहनकृष्ण श्रेष्ठ , सुरज साय्मि , सुनिता मानन्धर , एलिना मानन्धर , सलिलसुन्दर तुलाधर आदीपिन्सं म्येहालादीगु खःसा रोज महर्जन मय्जुं हनुमान जुया प्याखँ हुलादीगु खः ।
अथेहेतुं राजन शाही व संन्ध्या खडगी पिन्सं नं हुला प्याखँ न्ह्यब्वःयादीगु उगु लसता ज्याझ्वलय् अन झायादीपिं पाहाँपिं दथुइ “समय्बजी”या छगू लोकंह्वाःगु अंशया रुपय् धस्वाना च्वंगु क्वाः कासाः नं म्हितूगु खः ।
![](http://www.lahananews.com/sites/default/files/pictures/23434706_839002816282653_6849392791114000931_n.jpg)