सन्धिखर्क व हुम्लाय् जूगु दुर्घटनाय् २०म्ह सित
लहना न्यूज | ने.सं. ११४० थिंलाथ्व पारु (२७ नोभेम्बर २०१९), बुधवाः
![](https://www.lahananews.com/sites/default/files/narpaniaccident-27112019010056-1000x0.jpg)
अर्घाखाँचीया सन्धिखर्क नगरपालिका–६ नरपानीइ थौं बुधवाः सनिलय् जूगु बस दुर्घटनाय् १७म्ह घटनास्थल हे मन्त ।
सन्धिखर्कपाखें बुटवल वनाच्वंगु लु २ ख २१४८ ल्याःया बस नरपानी बजार लिक्कसं घुम्तीइ दुर्घटना जूगु खः । दुर्घटनास्थलय् नेपाली सेना, नेपाल प्रहरी व सशस्त्र प्रहरी लिसें स्थानीयवासीतसें उद्धार यानाच्वंगु दु । आःतक झिंन्हय्म्हेसिगु घटनास्थल हे सीगु उद्दारय् खटे जूम्ह प्रहरी निरीक्षक सुरज सुवेदीं जानकारी बियादिल ।
बस सडकपाखें थ्यंमथ्यं स्वसः मिटर क्वय् कुतुंवंगु खः ।
अथे हे, हुम्लाय् टिपर दुर्घटना जूगु इलय् स्वम्ह सीगु दुसा १३म्ह घाःपाः जूगु दु ।
नेपाल खाद्य संस्थानया जाकि व मेमेगु बन्दोबस्तिया हलंज्वलंलिसें सदरमुकाम सिमकोट वनाच्वंगु लु ४ ख ३२६९ ल्याःया टिपर सिमकोट गाँउपालिका–७या लाग्नाडाँडाय् दुर्घटना जूगु खः । दुर्घटनाय् नाम्खा गाउँपालिका–१, हेप्का गांया छिरिङ लामा, नोरी लामा व तान्ज्योत लामा सीगु खः । टिपर सतक स्वयां थ्यंमथ्यं ३०गू मिटर क्वय् कुतुंवंगु खः ।
घाःपाः जूपिनिगु जिल्ला अस्पताल हुम्लाय् वासः जुयाच्वंगु व अप्वसिगु अवस्था गम्भीर जूगु प्रहरी नायव उपरीक्षक रामप्रसाद घर्तीमगरं जानकारी बियादिल ।
टिपर चालक काभ्रे जिल्लाया बुद्ध नगरपालिका–११, भालुखर्कया आनन्द तामाङयात स्थानीयबासीतसें नियन्त्रणय् कयाः प्रहरीयात लःल्हाःगु दु ।
चालकं मादक पदार्थ त्वनातःगुलिं दुर्घटना जूगु स्थानीयवासीतसें द्वपं ब्यूगु दु । तर, प्रहरीं धाःसा दुर्घटना छु हुनिं जूगु खः धइगु खँय् अनुसन्धान जुयाच्वंगु धाःगु दु ।
थ्व हे झ्वलय् दुर्घटनाय् घाःपाः जूपिनिगु अवस्था सीकेत कर्णाली प्रदेशया सामाजिक विकासमन्त्री दल रावल अस्पताल थ्यंकादीगु दु ।
Categorized in राष्ट्रिय