संस्थागत मूल्यमान्यता अःखः नेवाः देय् दबू
लहनान्युज | चौलागा द्धादशी ११३९ (मे १ २०१९)
ने.सं. ११३९ चिल्लाथ्व दुतिया व तृतिया कुन्हु सुदूरपश्चिम धनगढीइ नेवाः देय् दबूया प्यक्वःगु केन्द्रीय मुँज्या लिपा विवादया चाकलय् लाःगु दु । विशेष यानाः उगु दबूया दांभरि अञ्जिता
खड्गी व केन्द्रीय दुजः रश्मिला प्रजापतिया जिम्मेवारी हेरफेर याःगु खँयात कयाः थुकथं विवादय् लाःगु खः ।
थुकियात कयाः नेवाः देय् दबूया दांभरि अञ्जिता खड्गीं वंगु चौलाथ्व बुधवाः प्रेस विज्ञप्ति पिथसें दबूया नायः नरेश ताम्रकारलिसे दबुल् आर्थिक अपचलन जुयाच्वंगु व हिसाव किताव पारदर्शी मखुगु खँयात कयाः कचवं जूगुलिं थःम्हेस्यां जिम्मेवारी कयातयागु कार्यभारपाखें चीकेगु ज्या जूगु खःधकाः द्वपं बियादीगु दुसा व हे लिधंसाय् जिल्ला प्रशासन कार्यालयस उजुरी बीधुंकाः ‘कोषाध्यक्षअञ्जिता खड्गीलाई संस्थाको विधानको कुनदफा उपयोग गरी हटाइ केन्द्रीय सदस्य बनाएको हो सो को यथार्थ विवरण’ न्ह्यब्वय्त जिल्ला प्रशासन ज्याकुथिया प्रशासकीय अधिकृत सुजन फागो लिम्बुपाखें देय् दबूयात स्पष्टिकरण न्यनेगु ज्या जूगु दु ।
दांभरि खड्गीयात कार्यभारं चीकूगु खँयात कयाः विवाद जुइवं थ्व सम्बन्धय् दबूया नायः ताम्रकारं मिति २०७४ जेठ १२गते च्वंगु न्हापांगु मुँज्यां याःगु क्वःछिना कथं विधानया दफा १४, उपदफा ४या व्यवस्था कथं नेवाः देय् दबूया कार्यविभाजन याःगुलिइ आः उगु कार्य विभाजन हेरफेर याय्गु सर्वसम्मतं निर्णय जूकथं हे खड्गीयात केन्द्रीय दुजः कथं जक जिम्मेवारी बियागु धयादीगु दु । वय्कःया कथं खड्गी निक्वः तक सचिवालयया मुँज्याय् अनुपस्थित जूगु व उगु मुँज्याय् हिसाव किताव न्ह्यब्वय्गु ज्या मजूगुलिं खड्गी थःगु जिम्मेवारी मकाःगु स्पष्ट जूगुलिं हे थुकथं सर्वसम्मतं निर्णय याःगु खः ।
जिम्मेवारी बहन मयाःगु खःसा न्हापां स्पष्टिकरण काय् माःगु खँयात कयाः न्ह्यसः तःगु इलय् वय्कलं निक्वः तक मुँज्याय् अनुपस्थित जुयाः हिसावकिताव न्ह्यमब्वगुलिं हे नं वय्कः थःगु जिम्मेवारीपाखें लिच्यूगु खः व थुकियात कयाः सर्वसम्मतं निर्णय याःगुलिं नं थुुकी छुं नं विवाद मदुगु धयादिल । तर न्ह्याग्गु हे थःगु तर्क बीगु ज्या याःसां नं मुँज्याय् स्वक्वः तक उपस्थित मजूसा स्पष्टिकरण काय्गु व उकिया नितिं ७न्हु तक म्याद बियाः उकी नं स्पष्टिकरण मब्यूसा जककार्यभारं चीके फइगु व्यवस्था दुगु दांभरि अञ्जिता खड्गीं धयादीगु दु ।
दांभरि खड्गीया कथं नेवाः तय्गु राष्ट्रिय संगठन कथं कयातःगु नेवाः देय् दबुली नायः पाखें यकः तिकथं ज्या यानाच्वंगु खः ।
छु नं संगठनयात ग्वाहालि बीमाःसा उकियात सचिवालयया मुँज्यां अनुमोदन मयाय्कं हे ग्वाहालि याय्गु व उकियात कयाः रेकर्ड तय्गु नितिं पर्याप्त प्रतिवेदन व भ्वंतक नं न्ह्यम ब्वःगु दांभरि खड्गीया द्वपं खः । वय्कलं झिद्वः तका ग्वाहालि याय्गु प्रावधान दुगु खःसा नं उगु ग्वाहालि थः यत्थे छ्यलाच्वंगु धयादीगु दु । गन नं भाषा, लिपि कक्षावा छु नं कथंया ज्याया नितिं ग्वाहालि ब्यूगु खःसा नं उकिया छुं नं रेकर्ड मदुगु व उकियात कयाः वेवास्ता याःगुलिं हे थजाःगु समस्या वःगु खँ धयादिल । अझ थुकियात कयाः सचिवालय मुँज्यापाखें पारित याय्माः धयाबलय् थुकि यात कयाः नायः ताम्रकारं थजाःगु चिचीधंगु खँयात कयाः विवाद याय् मज्यू धइगु आशयं उपेक्षा याना वयाच्वंगु नं धयादिल ।
थजाःगु हे जिम्मेवारी हेरफेरयात कयाः नेवाः देय्् दबूया निर्वाचित केन्द्रीयदुजः रश्मिला प्रजापतिं नं विरोध याःगु दु । प्यक्वःगु केन्द्रीय मुँज्याया निर्णय ६ कथं ‘सचिवालय पुनःगठन गरियो’ धकाः केन्द्रीय दांभरि अञ्जिता खड्गीया थासय् शान्त श्रेष्ठ व सचिवालय दुजः रश्मिला प्रजापतिया थासय् बदन शर्मा राजोपाध्यायया नां तया तःगुलिं नेवाः देय् दबूया खुक्वःगु तःमुँज्यापाखें निर्वाचितजूम्ह केन्द्रीय दुजःया हैसियतं थुकथं जिम्मेवारीया हेरफेर याय् माःगुया कारण छु खः धकाः तकं न्ह्यसः तयादिल, प्रजापतिं । वय्कलं नं दबूया नायः नं याना वयाच्वंगु ज्यायात कयाः असहमति प्वंकूसें देय् दबूया ज्या विधान सम्मत मजूगु विशेष यानाः आर्थिक ग्वाहालि बीधुंकाः सचिवालय् मुँज्याय् पारित याय्त हइगु खँयात कयाः सः थ्वय्कूगुलिं हे जिम्मेवार हेरफेरया मू कारण खःला? धकाः न्ह्यसः छु नादीगु दु ।
थ्व हे झ्वलय् विधानया दफा १४, उपदफा ४ या व्यवस्था कथं पदाधिकारीपिनिगु जिम्मेवारी हेरफेर यानागु धकाः निर्णय याःगु धाःसां नं पदाधिकारीयात स्पष्टिकरण हे मकासें नायःया प्रस्तावय् कार्यविभाजन हेरफेर याय्गु गुलितक पाय्छि खः? थुकियात कयाः महासचिवलिसें फुक्क् केन्द्रीय दुजः पिंन्सं लिसः बीमाःगु खःवा मखु ? मेगु मितिं २०७४ जेठ १२ गते च्वंगु न्हापांगु मुँज्यां केन्द्रीय समिति गठन लिपा नायःया प्रस्तावय् केन्द्रीय समितिया क्वःछिनापाखें निर्वाचित दुजःपाखें महासचिव नियुक्त याय् फइ व कार्यविभाजन केन्द्रीय दुजःपाखें याय् फइ धाःसां नं थ्व पटक पटक याय्फइ, थुकिया कार्यावधि व चीकेमाःगु मनासिव कारणयात कयाः न्ववाना मतःगुलिं थ्व छगू कथं नायःया अधिनायकवाद ज्या जक मजूला धइगु न्ह्यसः नं ब्वलंगु दु ।
थथे जुइ बलय् नायःयात चित्त बुझे मजुइवं हरेक पटक थुकथं स्पष्टिकरण बीगु हे ह्वःताः मब्यूसे कार्यभार हेरफेर याय्गु ज्यां संगठनय् नायःया हैसियत छु खः धइगु स्पष्ट जूगु जक मखु कि थुकिं संगठनयात गजाःगु लिच्वः लाकि धइगु बिचाः याय् माःगु खनेदु । नायः ताम्रकारया भासं धाय्गु खःसा थ्व हेरफेर धइगु ‘प्रधानमन्त्रीं मन्त्रीमण्डलय् मन्त्री तय्गु ज्या खँयात कयाः चित्तबुझे मजूगुलिं ज्यायात कयाः हेरफेर जकयानागु खः ।’ धइगु धापुतिं संगठन दुने अधिनायकवाद दुगु स्पष्ट क्यनाच्वंगु दु ।
नेवाः तय्गु राष्ट्रिय संगठन कथं स्थापित जुयाच्वंगु नेवाः देय् दबुलीवःगु थुगु विवादं यानाः नेवाः संगठनय् जक मखु, नेवाः जातियात कयाः मेमेगु जाति, संगठनं स्वइगु दृष्टिकोण हे पाना वनीगु खनेदु । विशेष यानाःआदिवासी जनजातिया ज्याखँय् वा थःगु पहिचानया नितिं न्ह्यज्याय् माःगु अवस्थाय् तकं नेवाः देय् दबुलिं थःगु उपस्थिति क्यने मफूगु व नेवाःतय् दथुइ थःगु ‘छवि’ स्यना वनाच्वंगु अवस्थाय् नेवाः देय् दबूया थजाःगु प्रबृत्तिं दूरगामी लिच्वः लाकीगु खनेदु ।
