जुम्लाया चन्दननाथ नगरपालिकालिसे भगिनी स्वापू स्थापना यायेगु निर्णय याःगु येँ महानगरपालिकां थौं अनया नगर प्रमुख क्रान्तिका सेजुवाललिसेंया जनप्रतिनिधिलिसे सहलह याःगु दु ।

सहलहया झ्वलय् येँ महानगरपालिकाया प्रमुख विद्या सुन्दर शाक्यं निगू नगर क्षेत्र दुनेया जीवन्त संस्कृति, सम्पदा व पर्यटकीय, पर्यावरण क्षेत्रया संरक्षण, प्रवर्ध्दन, विकास व प्रचार प्रसारय् सहकार्य यायेगु धयादिल ।

'साँस्कृतिक सहर येँ व कर्णालीया दुर्गम नगरपालिका चन्दननाथ दथुइ भगिनी स्वापू स्थापना यायेगु खँ सकारात्मक खः,’ शाक्यं धयादिल, थवंथवय् सहकार्य, ठोस योजना अले नतिजामूखि क्रियाकलाप न्ह्याकेत साझेदारी यायेत स्वयागु दु ।’

संघीयतायात सार्थक व अझ बल्लाकेत लिपांगु इलय् स्वदेशया हे नगरलिसे भगिनी स्वापू स्थापना यायेगु कुतः न्ह्यःने यंकागु शाक्यं धयादिल ।

उगु इलय् शाक्यं येँया १० नगर, ख्वपया मध्यपुर थिमि व रामग्राम नगरपालिकालिसे साझेदारीया छुं ज्या न्ह्यःने यंकागु जानकारी नं याकादिल ।

भगिनी स्वापू स्थापना धुंकाः जुम्लाय् उत्पादिन बहुमुल्य जडिबुटी, स्याउ, सिमि, ख्वःसिं लिसेंया प्राङ्गरिक कृषि उत्पादनया बजारीकरण, व्यवस्थापन लिसेंया विषयस नं सहकार्य यायेफइगु शाक्यं धयादिल । रारा, सेफोक्सुण्डो थुज्वःगु थासय् वनेगु लँय् हे लाःगु चन्दननाथलिसे धार्मिक पर्यटनयात तकं स्वानाः देय्या अर्थतन्त्रयात समृद्ध दयेके फइगु बिचाः शाक्यं तयादिल ।

चन्दननाथ नगरपालिकाया प्रमुख सेजुवालं स्रोत–साधनं जाःगु येँ महानगरपालिकालिसे भगिनी स्वापू स्थापना याये दुगुलिइ लसता प्वंकादिल । निगू नगरत धार्मिक पर्यटनलिसे नं स्वानाः न्ह्याःवनेफइगु बिचाः सेजुवालं तयादिल ।

येँ महानगरपालिकाया उप–प्रमुख हरिप्रभा खड्गी श्रेष्ठं नं भगिनी स्वापू स्थापना धुंकाः निगू नगरं सहकार्य यायेफइगु धयादिल ।

थौं हे धनकुटाया पाख्रिवास नगरपालिकाया प्रमुख वृषबहादुर राई व जनप्रतिनिधिलिसे नं सहलह जूगु दु । सहलहस प्रमुख राईं नं वइगु दिनय् सहकार्य यानाः न्ह्याःवनेत भगिनी स्वापू स्थापनाया लागिं प्रस्ताव तयादिल ।

Categorized in राष्ट्रिय