शान्तिया कामना यासें कथिन चीवरदान
लहनान्यूज सम्वाददाता | कौलागा अष्टमि ११३६ (अक्टोबर २३ २०१६)
![](https://www.lahananews.com/sites/default/files/chibar.jpg)
देशय् शान्ति, मैत्री व समृद्धिया कामना यासें सलंसः भिक्षु व भिक्षुणीपिनिगु उपस्थितिइ राजधानीइ कथिन चीवर दानया ग्वसाः ग्वल ।
द्रव्यमानसिंह तुलाधर (भाईराजा) व बसन्धरा तुलाधरं राजधानीया भृकुटीमण्डपस्थित बुद्ध विहारय् थुगु ज्याझ्वःया ग्वसाः ग्वयादीगु खः । तुलाधर त्यपुया आव्हानय् ज्याझ्वलय् थ्यंपिं भिक्षुपिनिगुपाखें शीलप्रार्थना व प्रवचन याःगु खः ।
व धुंकाः तुलाधर त्यपुलिसें बुद्ध धर्मप्रति आस्था तइपिं सलंसःम्हेसिनं भिक्षुभिक्षुणीपिन्त न्हियान्हिथंया जीवनय् मदयकं मगाःगु च्याता ज्वलं (अष्टपरिष्टकार) दान याःगु खः । दानं मनय् दुगु लोभ व कञ्जुस भाव चिलावनीगु विश्वास लिसें उपस्थित दातापिन्सं थम्हं फुथे नगद लिसें थीथी ज्वलं दान याःगु खः ।
भिक्षुपिं असार पुन्हिनिसें कतिपुन्हितक्क छगू हे विहारय् च्वनाः ध्यान व ज्ञानया अभ्यास (वर्षावास) यायेधुंकाः जक उगु दान बीगु परम्परा दुगुलिं स्थविरवाद बुद्ध धर्मय् थुगु दानयात दुर्लभ कथंया दानया रुपं काइ । गौतम बुद्धया पालनिसें हे न्ह्यानावयाच्वंगु थुगु परम्परा कथं थुगुसी बुद्ध विहारय् अखिल नेपाल भिक्षु महासंघया मू छ्यान्जे तकं खःम्ह भिक्षु कौण्डन्य, भिक्षु सुद्धिको व भिक्षु धम्मदत वर्षावास च्वनाद्यूगु खः ।
दानया महिमा ब्वलंकीगु थुगु पर्वय् अष्टपरिष्टकार दानय् प्राप्त जुइगु धेबा लुम्बिनीइ नेपाःमिनिगु पाखें दयेकाच्वंगु थेरवाद बुद्ध विहार दयेकेगु ज्याय् खर्च यायेगु नं मू छ्यान्जे भिक्षु कौण्डन्यं जानकारी बियादिल । ‘अष्टपरिष्टकार दानपाखें म्हइगु धेबा व भिक्षुपिन्त प्राप्त जुइगु दानया निश्चित धेबा लुम्बिनीइ विहार दयेकेगु ज्याय् खर्च यायेगु नीति न्हापा थें थुगुसी नं निरन्तरता बियागु दु । ’मू छ्यान्जे भिक्षु कौण्डन्यं लहनान्यूजयात धयादिल ।
Categorized in राष्ट्रिय