येँं महानगरपालिकाया मेयर विद्यासुन्दर शाक्यं राष्ट्रिय विभूति शंखधर साख्वाःया झ्वाता तयेगु उपयुक्त थाय् उपलब्ध दुसा अन महानगरपालिकापाखे मेगु तधःगु झ्वाता स्थापना यायेगु बचं बियादिगु दु।

येँया पुलागु रत्नपार्कया नां हिला शंखधर पार्क नामाकरण यानागु व अन शंखधर साख्वाःया झ्वाता स्थापना यानागु बारे वयाच्वंगु टिकाटिप्पणीप्रति लक्षित यासे अथे धयादिगु खः।  राष्ट्रिय विभूति शंखधर साख्वाः दिवसया लसताय् थौं मंगलवाः येँया १५ वडाय् लखुतीर्थय् ग्वसाः ग्वःगु ज्याझ्वलय्  सम्बोधन यासे मेयर शाक्य अथे धयादिगु खः।

वयकलं, ‘नेपाल संवतया प्रवर्तक शंखधर साख्वाःया योगदानयात चिरस्मरणीय दयेकेत येँ महानगरपालिकां वःगु शनिवाः शंखधर उद्यानय् शंखधर साख्वाःया सालिक स्थापना याःगु खः। अन सालिक तयेगु छु खँ पिहावःगु खः। शंखधर साख्वाःया सालिक अन मतस्ये मेगु थासय् तःसा बालाइगु सुझाव न वःगु दु।

यदि गनं अज्यागु थाय् दु सा जिमित धयादिसँ, जिमिसं आःसिया बालागु भव्य शंखधर साख्वाःया झ्वाता स्थापना याये।’ किंवदन्ती कथं शंखधर साख्वाःनं लखुतीर्थ हःगु फि लुय्ँ परिणत जूगु व लुँ मिया वःगु ध्यवाः ऋणय् डुबे जुपि तत्कालीन नेपाःया जनता पिनिगु ऋणमुक्त यासे न्हुगु युग शुरु जूगु संकेत स्वरुप नेपाल संवत् स्थापना यानादिगु खः।

शंखधरनाप जोडे जुगु उगु लखुतीर्थयात आः येँ महानगरपालिकां पुनर्निर्माण यासे धार्मिक पार्कया रूपं विकास यायेत्यःगु खः। मेयर शाक्यं उगु पार्क निर्माण यासे शंखधर साख्वाःया गरिमा अझ अप्वो जुइ धका धयादीगु खः।

नेपाल संवत् न्हूदँ राष्ट्रिय समारोह समिति–११४१ पाखे ग्वसाः ग्वःगु ज्याझ्वलय् समितिया अध्यक्ष रमेश महर्जनं सकसिगु नेपाल संवतयात राष्ट्रिय मान्यता बिइकेत सफलता प्राप्त यायेत अपुगु धका धयादीगु दु।

Categorized in राष्ट्रिय