विश्वकप क्रिकेट : इङ्गल्यान्ड मू दावेदार
![](https://www.lahananews.com/sites/default/files/field/image/icc%20criket.jpg)
प्रजीत शाक्य
सन् १९७५ व १९७९ य् क्वचाःगु न्हापांगु व निगूगु विश्वकप क्रिकेट कासाया उपाधि वेष्ट इण्डिजं त्याकूगु खः । उगु इलय् वेष्ट इण्डिज अजय जुयाच्वंगु खः । वेष्ट इण्डिजया धाकयात हाथ्याः बीगु टिम छुं हे मदु धाःसा पाइ मखु ।
सन् १९८३ य् जूगु स्वंगूगु संस्करणय् नं वेष्ट इण्डिज उपाधिया मू दावेदार जुयाच्वंगु खः । वेष्ट इण्डिज अःपुक्क हे फाइनलय् नं थ्यन । तर वेष्ट इण्डिजं उपाधिया नितिं जूगु धेंधें बल्लाय् तुलनात्मक कथं कमजोर भारतयात बुके मफुत । वेष्ट इण्डिजं उपाधिइ ह्याट्रिक याय् मफुत । व लिपा वेष्ट इण्डिजं आःतक नं हाकनं ट्रफि थःगु देशय् दुत हय् फूगु मदुनि । थ्व हे दथुइ सन् १९८७ इ अष्ट्रेलियां, सन् १९९२य् पाकिस्तानं, सन् १९९६य् श्रीलङ्कां विश्व विजेता जुइगु गौरव प्राप्त यात ।
सन् १९९९, २००३ व २००७य् उपाधि त्याकाः अष्ट्रेलियां ह्याट्रिक हे यात । अष्ट्रेलिया वंगु संस्करणया नं विजेता टिम खः । थ्व हे दथुइ भारत घरेलु कासा ख्यलय् सन् २०११ य् विश्व च्याम्पियन जुल । विश्वकपया मेगु संस्करण निन्हु लिपा इङ्गल्याण्डय् शुरु जुइ । थुगुसी छु टिमं कासा त्याकी ? अनुमान याय्त तसकं थाकु । छाय्धाःसा विश्वकपय् दुथ्याःगु झिगुलिं देश छगू
टिमं मेगु टिमयात बुकेत सक्षम खनेदु । उकिं विश्वकप उपाधिया विजेता थ्व हे जुइ धकाः धाय्गु नं गलत सावित जुइफु । अथेखःसां नं घरेलु टिम इङ्गल्याण्डयात मू दावेदार कथं कयातःगु दु । व लिपा भारत, अष्ट्रेलिया, पाकिस्तान, न्यूजिल्याण्ड, दक्षिण अफ्रिका व वेष्ट इण्डिज नं उपाधि त्याकेत सक्षम खनेदु ।
क्रिकेटतया जननी देय् इङ्गल्याण्डं आःतक विश्वकप उपाधि त्याकेफूगु मदुनि । स्वक्वः तक फाइनलय् थ्यंकाः नं च्याम्पियन जुइ मफूगु इङ्गल्याण्डयात थुगुसी मू दावेदार कथं कयातःगु दु । थुकिया छुं छुं हुनिं नं दु ।
दकलय् न्हापां ला आइसीसी वरियताया शीर्ष थासय् दु इङ्गल्याण्ड । सन् २०१७य् च्याम्पियन ट्रफिया सेमीफाइनलय् बुइ धुंकाः इङ्गल्याण्डं आःतक एकदिवसीय श्रृङ्खला बूगु मदुनि । थ्व हे दथुइ इङ्गल्याण्डं अष्ट्रेलिया (निक्वःतक), न्यूजिल्याण्ड, भारत व श्रीलङ्कायात श्रृङ्खलाय् बुकूगु दु । थुगुसी वेष्ट इण्डिज विरुद्धया श्रृङ्खला २÷२गूया बराबरीइ क्वचाःगु जक इङ्गल्याण्डया नितिं कमजोर लिच्वः जूगु दु । विश्वकपय् म्हितीगु इङ्गल्याण्ड जक अजाःगु टिम खः, गुकी प्यम्ह ब्याट्स्म्यान जोय रुट, जस बट्लर, जोनी बेरिष्टा व इयोन मोर्गन आइसीसी वरियताया शीर्ष २०म्हय् दुथ्यानाच्वंगु दु ।
अथे हे घरेलु कासाख्यः व स्वकुमि इङ्गल्याण्डया नितिं दकलय् तःधंगु ‘प्लस प्वाइन्ट’ जुइ । स्वीङ व बल मूभ जुइगु पीच व ओभरकाष्ट कण्डिशन इङ्गल्याण्डया क्रिकेटया विशेषता खः । गुगु अवस्थाय् म्हितेत इङ्गल्याण्ड अभ्यस्त जुयाच्वंगु दु ।
सन् २०१५य् विश्वकपया समूह चरणपाखें पिहां वनेधुंकाः अपमानित महसूस याःगु इङ्गल्याण्डं व लिपा फुक्क ध्यान एकदिवसीय व टि ट्वान्टी थेंजाःगु चिहाकःगु संरचनाया क्रिकेटय् तःगु
खः । प्रशिक्षक ट्रेभर बेलिस व कप्तान इयोग मोर्गनं टिमय् आक्रामक, सकारात्मक, जोखिम काइगु मनस्थितिया कासा दय्काबिल । व लिपा इङ्गल्याण्डया टिमय् चमत्कार जूगु दु ।
विश्वकप लिपा एकदिवसीय क्रिकेटय् दय्कूगु १७गू मध्ये १५गू दकलय् अप्वः स्कोर इङ्गल्याण्डया हे नामय् दु । थ्व हे दथुइ सन्् २०१८य् अष्ट्रेलिया विरुद्ध ४८१गू रन व पाकिस्तान विरुद्ध ४४४गू रन दय्काः इङ्गल्याण्ड निगू दकलय् अप्वः स्कोरया कीर्तिमान नं दय्केत ताःलात ।
निगूगु पालिइ दकलय् अप्वः ११गू मध्ये ५गू स्कोर इङ्गल्याण्डया नामय् दु । घरेलु कासाख्यलय् जूगु एकदिवसीय क्रिकेटय् लक्ष पूवंकेगु झ्वलय् इङ्गल्याण्डं १८गू कासा त्याकूगु दु । वंगु फेब्रुअरीइ वेष्ट इण्डिज विरुद्धया कासाय् इङ्गल्याण्डं २४गू छक्का थ्वानाः विश्व कीर्तिमान दय्कूगु खः ।
ब्याटिङ्ग इङ्गल्याण्डया दकलय् बल्लाःगु व ग्यानापूगु पक्ष खः । मोइन अलि थेंजाःम्ह विश्वस्तरीय ब्याट्स्म्यान च्यागूगु वरियताय् दुगुलिं नं इङ्गल्याण्डया ब्याटिङ्ग क्रम गुलि बल्लाः धइगु सीदु । जोनी बेरिष्टो व इयोन मोर्गन बांलाक्क कासा प्रदर्शन यानाच्वंगु दुसा जस बट्लर विश्व क्रिकेटया हे उत्कृष्ट विष्फोटक ब्याट्सम्यान खः ।
इङ्गल्याण्डया बलिङ्ग नं सन्तुलित खनेदु । आदिल रसिद भलसा काय्बहःम्ह स्पीनर खःसा बेन स्टोक्स व क्रिस वोक्स थेंजाःम्ह अलराउण्डरं इङ्गल्याण्डया टिमयात थप शक्ति ब्यूगु दु । न्हूम्ह तेज बेलर जोफ्रा आर्चरं इङ्गल्याण्डया टिमय् ‘एक्स–फ्याक्टर’ हइगु विश्वास यानातःगु दु ।
इङ्गल्याण्ड लिपा भारतयात दावेदारकथं कयातःगु दु । विश्वया निम्ह शीर्ष ब्याट्सम्यान विराट कोहली व रोहित शर्माया उपस्थितिं भारतया ब्याटिङ्ग तसकं बल्लाःगु खनेदु । विश्वया सर्वश्रेष्ठ बलर जस्प्रित बुम्राह नं भारतया टिमय् दु । लिपांगु ४९गू एकदिवसीय कासाय् बुम्राहं ८५गू विकेट काःगु खः । इङ्गल्याण्डय् हे जूगु लिपांगु निगू च्याम्पियन ट्रफिइ उपविजेता जूगु भारतं
इङ्गल्याण्डया ‘कण्डिशन’य् म्हितेफूगु सावित याय्धुंकूगु दु ।
विश्वकपया दकलय् सफल टिम अष्ट्रेलिया पुलांम्ह कप्तान नापं उपकप्तान स्तिम स्मिथ व डेभिड वार्नरया पुनरागमनय् उत्साह तनाब्यूगु दु । न्याक्वःतक विश्वकप त्याकेधुंकूगु अष्ट्रेलिया लिपांगु न्यागू मध्ये प्यंगू उपाधि त्याकूगु टिम खः । नकतिनि हे भारत व पाकिस्तान थेंजाःगु बल्लाःगु टिमयात बुकूगुलिं नं थुगुसी न्हापाथें जाःगु टिम मजूसा नं अष्ट्रेलियायात कमजोरकथं काय् मज्यू ।
विश्वकपय् दक्षिण अफ्रिकायात दकलय् ‘अभागी टिम’कथं कयातःगु दु । तःक्वःमछि दावेदार जूसां नं महत्वपूर्ण कासा बूगुलिं दक्षिण अफ्रिका ट्रफिपाखें बञ्चित जुजुं वयाच्वंगु दु । थुगुसी हासिम आम्ला व क्विटन डि कक दक्षिण अफ्रिकाया बांलाःपिं कासामित खः । तेज बलिङ्गया आक्रमण बांलाःसा नं स्पीन पक्षय् धाःसा दक्षिण अफ्रिका कमजोर खनेदु ।
न्यूजिल्याण्ड विश्वकपय् न्ह्याबलें बांलाक्क प्रदर्शन याइगु टिम खः । थ्व स्वयां न्ह्यःया संस्करणय् उपविजेत जूगु न्यूजिल्याण्ड उपाधिया दावेदारतय्गु नितिं थुगुसी नं दकलय् तःधंगु खतरा जुइफु । न्यूजिल्याण्डया टिमय् अलराउण्डरया बाहुल्यता खनेदु । अथे हे कप्तान केन विलियम्स व रस टेलर थेंजाःपिं ब्याट्सम्यान व टिम साउथी व ट्रेन्ट बोल्ट थेंजाःपिं बलरतय्सं यानाः न्यूजिल्याण्ड स्वय्बहःगु टिम सावित जुइफु ।
शुरुया निगू संस्करणय् विजेता जूगु इलय् वेष्ट इण्डिज ‘अजय टिम’कथं न्ह्यःने वःगु खः । आः वेष्ट इण्डिजया स्तर उलि बांलाः मजू । अथेखःसां एकदिवसीय संरचनाय् वेष्ट इण्डिज कमजोर नं मजू । क्रिस गेल थेंजाःम्ह विष्फोटक ब्याट्सम्यान वेष्ट इण्डिजया टिमय् दु । डारेन ब्राभोया उपस्थितिं मध्यक्रम नं क्वात्तुगु खनेदु । एन्द्रयु रसेल थेंजाःम्ह अलराउण्डरया आगमनं वेष्ट इण्डिजयात उत्साह अझ तनाब्यूगु दु ।
निदँ न्ह्यः इङ्गल्याण्डय् हे मिनी विश्वकप च्याम्पियन्स ट्रफि त्याकूगुलिं पाकिस्तानयात दावेदारया धलखं अलग्ग तय् फइमखु । पाकिस्तानया टिमय् इमाम उल हक व बाबर आजम थेंजाःगु भलसा याय्बहःपिं ब्याट्सम्यानत दु । बलिङ्ग न्ह्याबलें थें पाकिस्तानया बल्लाःगु पक्ष खः । अथेखःसां पाकिस्तानया ब्वज्याय् धाःसा स्थिरता खनेमदु ।
विश्वकपय् दुथ्याःगु मेगु स्वंगू देय् श्रीलङ्का, बङ्गलादेश व अफगानिस्तानयात उपाधि त्याकीगु टिमकथं कयातःगु मदु । अथेखःसां थ्व स्वंगुलिं टिमं छुं नं इलय् छुं नं टिमयात बुकेफूगु जूगुलिं थुगुसीया विश्वकप छु नं टिमया नितिं कासा अःपू जुइमखु धइगु खँ प्रष्ट जुयाच्वंगु खनेदु ।