म्ये हालामि विरज महर्जनया नेपालभाषाया लाेकंह्वाःगु 'तुयुतुयु धाःगु' व खस भायया 'अामा' म्येया म्यूजिक भिडियाे पिदन । जुगल डंगाेलया संगीत व संगीत संयाेजनय् पूर्णकाजी ज्यापुया च्वसाय् 'तुयुतुयु धाःगु' म्येया नितिं म्येहालामि महर्जनं सर्वाेत्कष्ट नव कलाकार पेजथ्री पिपुल्स च्वाइस अवार्ड त्याकादीगु खः ।

 

 

थुगु म्यूजिक भिडियाे अनुज डंगाेलं निर्देशन यानादीगु खः । ज्याझ्वलय् सार्वजनिक जूगु मेगु म्ये बद्री देसारया संगीत व रचनाय् विरजं हालादीगु 'अामा' म्येया म्यूजिक भिडियाे विलक्षण कृयशनपाखें निर्माण जूगु खः । 

 

अतिकं चीधिबलय् हे हिसिदयेक म्ये हालादीम्ह विरजया अबुजु विनोद महर्जनं कायया थुगु गुण वाःचायेका संगीत शिक्षा कायकादिल । १० दँ दुबलय् हे रघुनाथ महर्जनपाखें संगीत सयेकादीम्ह विरजं १३ दुबलय् हे विरजया म्ये न्यने न्यंकेगु नितिं एकल साँझ ज्याझ्व जूगु खः ।

 

बज्रवाराही फूलबारी पार्टी प्यालेसय् जूगु थुगु ज्याझ्वः हिमालयन टेलिभिजनं प्रत्यक्ष प्रशारणतकं याःगु खः । १४ दँ दुबलय् हे ‘नयाँ किरण’ म्येचाः पिथनादीम्ह विरजया पिदंगु म्यूजिक भिडियो लोकह्वायमा धकाः ज्याझ्वलय् पाहाँपिं जुगल डंगाेल, पूर्णकाजी ज्यापु व बद्री देसारं भिंतुना देछानादीगु खः ।

 

ज्याझ्वः संगीतकःमि व संचारकःमि सुरजवीर बज्राचार्यं न्ह्याकादीगु खः ।

 

 

Categorized in मनोरन्जन